തീർത്ഥയാത്ര കഴിഞ്ഞ് മടങ്ങവേ കാർ മരത്തിലിടിച്ച് വീട്ടമ്മ മരിച്ചു

വടക്കാഞ്ചേരി: പളനി തീർത്ഥയാത്ര കഴിഞ്ഞ് മടങ്ങവേ കുടുംബം സഞ്ചരിച്ച കാർ ആറ്റൂരിൽ മരത്തിലിടിച്ച് വീട്ടമ്മ മരിച്ചു. മങ്ങാട് പന്തലങ്ങാട് ബാലചന്ദ്ര​​​െൻറ ഭാര്യ ചന്ദ്രികയാണ്​ (55) മരിച്ചത്​. ബാലചന്ദ്രനെ ഗുരുതര പരുക്കുകളോടെ തൃശൂർ ദയ ആശുപത്രിയിലെ അത്യാഹിത വിഭാഗത്തിൽ പ്രവേശിപ്പിച്ചു. കാർ ഓടിച്ച മകൻ സജിത്ത്, മുൻ സീറ്റിൽ ഇരുന്ന ഭാര്യ ഡിനു, മകൾ ഋതിക എന്നിവർ അത്ഭുതകരമായി രക്ഷപ്പെട്ടു. തിങ്കളാഴ്​ച പുലർച്ചെ 1.30ന് വാഴക്കോട്- പ്ലാഴി സംസ്ഥാന പാതയിൽ ആറ്റൂർ സ്കൂൾ വളവിലായിരുന്നു അപകടം. 

കഴിഞ്ഞ ദിവസം രാവിലെ 10നാണ്​ ഇവർ പളനിയിലേക്ക് പോയത്. ഒരു വയസുകാരി ഋതികയുടെ തല മുണ്ഡന വഴിപാട് തീർക്കുകയായിരുന്നു ലക്ഷ്യം. കുടുംബാംഗങ്ങൾ നല്ല ഉറക്കത്തിലായതോടെ സജിത്തും ഉറങ്ങി പോവുകയായിരുന്നുവെന്നാണ് കരുതുന്നത്. നിരന്തര അപകടമേഖലയായ ആറ്റൂർ വളവിലെത്തിയപ്പോൾ കാറി​​​െൻറ നിയന്ത്രണം നഷ്​ടപ്പെടുകയും പാതയോരത്തെ മരത്തിലിടിക്കുകയുമായിരുന്നു. 

അപകടം നടന്ന ഉടൻ എയർ ബാഗ് പ്രവർത്തിച്ചതാണ് സജിത്തിനും ഭാര്യക്കും കുഞ്ഞിനും രക്ഷയായത്. പിറകിലെ സീറ്റിലായിരുന്നു ബാലചന്ദ്രനും ചന്ദ്രികയും ഇരുന്നത്. ചന്ദ്രിക അപകടസ്ഥലത്ത് തന്നെ മരിച്ചു. ഓടിക്കൂടിയ നാട്ടുകാർ ചേർന്ന് കാർ വെട്ടിപൊളിച്ചാണ് എല്ലാ​വരെയും പുറത്തെടുത്തത്. സ്മിതയാണ് ചന്ദ്രികയുടെ മറ്റൊരുമകൾ.