ഓട്ടോയും ലോറിയും കൂട്ടിയിടിച്ച്  മൂന്നര വയസ്സുകാരനടക്കം രണ്ടു മരണം

തച്ചനാട്ടുകര: ദേശീയപാത 966ല്‍ മണ്ണാർക്കാടിനടുത്ത കൊമ്പത്ത് ഓട്ടോയും ലോറിയും കൂട്ടിയിടിച്ച് മൂന്നര വയസ്സുകാരന്‍ അടക്കം രണ്ടുപേര്‍ മരിച്ചു. കുട്ടികള്‍ അടക്കം ആറുപേര്‍ക്ക് ഗുരുതരമായി പരിക്കേറ്റു. പെരിന്തല്‍മണ്ണ കുന്നപ്പള്ളി കാഞ്ഞിരുണ്ടില്‍ ഇസ്മായിലി​​െൻറ ഭാര്യ ഖദീജ (48), സാദിഖി​​െൻറ മകന്‍ മുഹമ്മദ് റനീഷ് (മൂന്ന്) എന്നിവരാണ് മരിച്ചത്. തിങ്കളാഴ്ച വൈകീട്ട് ഏേഴാടെയാണ് സംഭവം. കുന്നപ്പള്ളി സ്വദേശികളായ കാഞ്ഞിരുണ്ടില്‍ ഇസ്മായില്‍ (56), പൊട്ടേങ്ങല്‍ ഷൗക്കത്തി​​െൻറ ഭാര്യ നുസ്റത്ത് (30), മക്കളായ ഹാഷിം, ഫാത്തിമത്ത് ലത്തീഫ (11), മുഹമ്മദ് മുസ്തഫ (ഏഴ്), കാഞ്ഞിരുണ്ടില്‍ നിസാനു സാദിഖി​​െൻറ മകൾ ഷഹാന (ഏഴ്) എന്നിവര്‍ക്കാണ് പരിക്ക്. ഇവരെ പെരിന്തല്‍മണ്ണ സ്വകാര്യ ആശുപത്രിയില്‍ പ്രവേശിപ്പിച്ചു. മലമ്പുഴയിലേക്ക് വിനോദയാത്ര പോയി തിരിച്ചുവരവെയാണ് അപകടം. മണ്ണാര്‍ക്കാട് ഭാഗത്തേക്ക് പോകുകയായിരുന്ന ലോറിയുമായി ഓട്ടോറിക്ഷ കൂട്ടിയിടിക്കുകയായിരുന്നു. ഓട്ടോയിൽ കുടുങ്ങിക്കിടന്നവരെ അഗ്നിശമന സേനയും നാട്ടുകാരും ചേര്‍ന്ന് വെട്ടിപ്പൊളിച്ചാണ് പുറത്തെടുത്തത്.