പാലക്കാട് യുവാക്കളുടെ മരണത്തിനിടയാക്കിയ അപകടം: കെ.എസ്.ആർ.ടി.സി ​ഡ്രൈവറെ സസ്‍പെൻഡ് ചെയ്തു

പാലക്കാട്: പാലക്കാട് നിന്നും വടക്കാഞ്ചേരിക്ക് സർവ്വീസ് നടത്തിയ കെ.എസ്.ആർ.ടി.സി ബസ് അപകടത്തിൽപ്പെട്ട് ബൈക്ക് യാത്രക്കാർ മരണപ്പെട്ട സംഭവത്തിൽ ബസ് ഡ്രൈവറെ സസ്പെൻഡ് ചെയ്തു. വടക്കഞ്ചേരി ഓപ്പറേറ്റിം​ഗ് സെന്ററിലെ ഡ്രൈവറായ സി.എൽ. ഔസേപ്പിനെയാണ് സി.എം.ഡി സസ്പെൻഡ് ചെയ്തത്.

സംഭവവുമായി ബന്ധപ്പെട്ടുള്ള വീഡിയോ ബസിന്റെ പിറകിലായി സഞ്ചരിച്ചിരുന്ന കാറിന്റെ ഡാഷ്ബോർഡിൽ പതിയുകയും വിവരം ന്യൂസ് ചാനലുകളിലും, സോഷ്യൽ മീഡിയകളിലും പ്രചരിക്കുകയും ചെയ്തിരുന്നു. ഇത് പരിശോധിച്ചതിന്റെ അടിസ്ഥാനത്തിൽ ബസ് ബൈക്ക് യാത്രക്കാരെ മറികടക്കാൻ ശ്രമിച്ചതാണ് അപകടത്തിന് കാരണമായതെന്ന അനുമാനത്തെ തുടർന്നാണ് നടപടിയെന്നും കെ.എസ്.ആർ.ടി.സി പുറത്തിറക്കിയ കുറിപ്പിലുണ്ട്.

കഴിഞ്ഞ ദിവസം കുഴൽമന്ദത്തിനടുത്ത് വെള്ളപ്പാറയിലുണ്ടായ അപകടത്തിൽ രണ്ട് പേരാണ് മരിച്ചത്. കാവിശ്ശേരി സ്വദേശി ആദർശ് മേഹൻ കാസർകോട് സ്വദേശി സബിത്ത് എന്നിവരാണ് അപകടത്തിൽപ്പെട്ടത്. രണ്ടുപേരും സംഭവസ്ഥലത്ത് തന്നെ മരിച്ചിരുന്നു.