ചേറ്റുവ പാലത്തിനു മുകളിൽ കണ്ടെയ്നർ ലോറിയും മിനിലോറിയും കൂട്ടിയിടിച്ച് രണ്ടുപേർ മരിച്ചു.

ചാവക്കാട്: ചേറ്റുവ പാലത്തിനു മുകളിൽ കണ്ടെയ്നർ ലോറിയും മിനിലോറിയും കൂട്ടിയിടിച്ച് രണ്ടുപേർ മരിച്ചു.മിനിലോറിയിലെ ജീവനക്കാരായ മേലേ പട്ടാമ്പി കൊളമ്പിൽ വീട്ടിൽ കുഞ്ഞിമുഹമ്മദിന്‍റെ മകൻ മുഹമ്മദാലി ( കുഞ്ഞു മണി - 49), ഓങ്ങല്ലൂർ കൊണ്ടൂർക്കര നൂറുൽ ഹിദായ ഇസ്ലാമിക് കോംപ്ലക്സിന്​ സമീപംകൊപ്പത്ത് പാറമ്മേൽ ബാവയുടെ മകൻ കെ.പി. ഉസ്മാൻ (60) എന്നിവരാണ് മരിച്ചത്.

ചൊവ്വാഴ്ച്ച ഉച്ചതിരിഞ്ഞ് 2.30 ഓടെ ചേറ്റുവ പാലത്തിന് മുകളിലാണ് അപകടമുണ്ടായത്. ചാവക്കാട് ഭാഗത്ത് നിന്നും വരികയായിരുന്ന കണ്ടെയ്​നർ ലോറി മറ്റൊരു വാഹനത്തെ മറികടന്ന് എതിരെ വന്ന മിനിലോറിയുമായി കൂട്ടിയിടിക്കുകയായിരുന്നു. ഇടിയുടെ ആഘാതത്തിൽ മിനി ലോറിയുടെ മുൻഭാഗം പൂർണമായും തകർന്നു. ഓടിക്കൂടിയ നാട്ടുകാരും മറ്റു വാഹനങ്ങളിലെ യാത്രക്കാരും ചേർന്ന് മിനിലോറിയുടെ മുൻഭാഗം വെട്ടിപ്പൊളിച്ചാണ് പരിക്കേറ്റവരെ പുറത്തെടുത്തത്. ഉടൻ തന്നെ ചേറ്റുവ ടി. എം ആശുപത്രിയിലെത്തിച്ചെങ്കിലും രണ്ടുപേരും മരിച്ചു. അപകടത്തെ തുടർന്ന് ദേശീയപാതയിൽ ഏറെ നേരത്തെ ഗതാഗതക്കുരുക്ക് അനുഭവപ്പെട്ടു.