കോഴിക്കോട് ബസും ബൈക്കും കൂട്ടിയിടിച്ച് പിതാവും രണ്ടു മക്കളും മരിച്ചു

ഫറോക്ക്: ദേശീയപാതയിൽ കെ.എസ്.ആർ.ടി.സി ബസും ബൈക്കും കൂട്ടിയിടിച്ച് ഒരു കുടുംബത്തിലെ മൂന്നു പേർ മരിച്ചു. ചെറുവണ്ണൂർ വില്ലേജ് ഓഫിസിന് സമീപം പഴയ പോസ്​റ്റ്​ ഓഫിസിന് മുൻവശത്തുണ്ടായ അപകടത്തിൽ നല്ലളം ചാലാറ്റി പാരാത്ത് മുല്ലവീട്ടിൽ ഹസൻകുട്ടി (58), മക്കളായ അബ്​ദുൽ ഖാദർ (12), ബഹാവുദ്ദീൻ (18) എന്നിവരാണ് മരിച്ചത്.

ഫറോക്കിൽനിന്ന്​ നല്ലളത്തേക്ക് പോകുകയായിരുന്ന ബൈക്കും കോഴിക്കോട്ടുനിന്ന്​ തൃശൂരിലേക്ക് പോകുകയായിരുന്ന കെ.എസ്.ആർ.ടി.സി ബസും വളവിൽ കൂട്ടിയിടിക്കുകയായിരുന്നു. ഹസൻകുട്ടിയും ബഹാവുദ്ദീനും സംഭവസ്ഥലത്തും അബ്​ദുൽ ഖാദർ ആശുപത്രിയിലുമാണ് മരിച്ചത്.

അപകടത്തിൽ തകർന്ന ബൈക്ക്

വ്യാഴാഴ്ച രാത്രി 11.30ഓടെയാണ് അപകടം. ചെറുവണ്ണൂർ ജങ്​ഷൻ മുതൽ പല ഭാഗങ്ങളിലും ജപ്പാൻ പദ്ധതിക്കായി വെട്ടിപ്പൊളിച്ച റോഡിൽ ആശാസ്ത്രീയമായ രീതിയിലാണ് ടാറിങ്​ നടത്തിയത്. റോഡിൽ പലഭാഗങ്ങളിലും ഗർത്തങ്ങളുണ്ട്​. കൊടിയ വളവിലെ ഗർത്തത്തിൽ ചാടാതിരിക്കാൻ വാഹനങ്ങൾ വെട്ടിച്ചെടുക്കുന്നത് ഇവിടെ പതിവാണ്. ഹസൻകുട്ടിയുടെ ഭാര്യ: ആയിഷ. മറ്റു മക്കൾ: ബദറുദ്ദീൻ, ഉമറുൽ ഫാറൂഖ്, റബീഅത്ത്, സാലിഹ്.