ടാങ്കർ ലോറിയിൽ ബൈക്കിടിച്ച് വിദ്യാർഥി മരിച്ചു   

പെരിന്തൽമണ്ണ: ടാങ്കർ ലോറിയിൽ ബൈക്കിടിച്ച് വിദ്യാർഥി മരിച്ചു. ആലപ്പുഴ വള്ളികുന്നം ബിസ്മി ഹൌസിൽ ഷംസിന്റെ മകനും മഞ്ചേരി ഇ.കെ.എം കോളേജിലെ മാസ് കമ്യൂണികേഷൻ വിദ്യാർഥിയുമായ ഷഹീൻ (21) ആണ് മരിച്ചത്.

രാത്രി 8.30തിന് അങ്ങാടിപ്പുറം മേൽപാലത്തിൽ വെച്ചായിരുന്നു അപകടം. പെരിന്തൽമണ്ണയിൽ നിന്ന് മലപ്പുറം ഭാഗത്തേക്ക് പോവുകയായിരുന്ന ടാങ്കർ ലോറിയുടെ പുറകിൽ നിയന്ത്രണംതെറ്റി ബൈക്ക് ഇടിച്ചാണ് അപകടമുണ്ടായതെന്ന് പോലീസ് പറഞ്ഞു.

ഇടിയെ തുടർന്ന് ബൈക്ക് യാത്രികൻ റോഡിലേക്ക് വീഴുകയായിരുന്നു. ബൈക്കിടിച്ച വിവരം അറിയാതെ മുന്നോട്ടു പോയ ടാങ്കർ ലോറിയെ രാമപുരത്തുവെച്ച് പോലീസ് പിന്തുടർന്ന് പിടികൂടുകയായിരുന്നു. മരണപ്പെട്ട ഷഹീന്റെ മൃതദേഹം പെരിന്തൽമണ്ണ ജില്ലാ ആശുപത്രി മോർച്ചറിയിലാണ്.