കാർ കെ.എസ്.ആർ.ടി.സി ബസുമായി കൂട്ടിയിടിച്ച് പ്രതിശ്രുത വധു മരിച്ചു

വള്ളിക്കുന്ന്: കെ.എസ്.ആർ.ടി.സി ബസും കാറും കൂട്ടിയിടിച്ച് പ്രതിശ്രുത വധു മരിച്ചു. അടുത്തയാഴ്ച വിവാഹം ഉറപ്പിച്ച പ്രതിശ്രുത വരനുമൊത്ത് കാറിൽ യാത്ര ചെയ്യുന്നതിനിടെയാണ് അപകടം. കൊളപ്പുറം വി.കെ പടിയിലെ പല്ലാട്ട് ശശിധര​​​െൻറ മകൾ ഭാഗ്യയാണ്​ (21) മരിച്ചത്. പ്രതിശ്രുത വരൻ കൊണ്ടോട്ടി കിഴിശ്ശേരി കുഴിമണ്ണയിലെ പരേതനായ മൂത്തേടത്ത്​ ചന്തുവി​​​െൻറ മകൻ ഷൈജുവിന്​ ഗുരുതര പരിക്കേറ്റു. 

ചേളാരിക്കും പാണമ്പ്രക്കും ഇടയിലുള്ള ഇറക്കത്തിൽ ഞായറാഴ്ച ഉച്ച 2.30ഒാടെയാണ്​ അപകടം. കോഴിക്കോട് ഭാഗത്തേക്ക് പോവുകയായിരുന്ന മാരുതി ആൾട്ടോ കാർ എതിരെ വന്ന കെ.എസ്.ആർ.ടി.സി സൂപ്പർഫാസ്​റ്റ്​ ബസുമായി കൂട്ടിയിടിക്കുകയായിരുന്നു. മറ്റൊരു വാഹനത്തെ മറികടന്നെത്തിയ കാറിൽ ഇടിക്കാതിരിക്കാൻ ബസ് ഡ്രൈവർ പരമാവധി വാഹനം ഇടതുവശത്തേക്ക് ഒതുക്കിയെങ്കിലും ഫലമുണ്ടായില്ല. 
 

ബസി​​​െൻറ വലതുവശത്തായാണ് കാറിടിച്ചത്. ഡ്രൈവറുടെ വാതിൽ ദൂരേക്ക് തെറിക്കുകയും ചെയ്തു. ബസി​​​െൻറ മുൻഭാഗം തകർന്നിട്ടുണ്ട്. ഇടിയുടെ ആഘാതത്തിൽ യുവതി കാറി​​​െൻറ ഡോർ തുറന്ന് പുറത്തേക്ക് തെറിച്ചുവീണു. മുൻഭാഗം പൂർണമായി തകർന്ന കാറിനുള്ളിൽനിന്ന് മറ്റു വാഹനങ്ങളിലെ യാത്രക്കാരും നാട്ടുകാരും ഏറെ പണിപ്പെട്ടാണ് യുവാവിനെ പുറത്തെടുത്തത്. 

ഗുരുതര പരിക്കേറ്റ രണ്ടുപേരെയും ആദ്യം ചേളാരിയിലെ സ്വകാര്യ ആശുപത്രിയിലും പിന്നീട് കോഴിക്കോട് മെഡിക്കൽ കോളജ്​ ആ​ശുപത്രിയിലും കൊണ്ടുപോയെങ്കിലും യുവതി വഴിമധ്യേ മരിച്ചു. തേഞ്ഞിപ്പലം അഡീഷനൽ എസ്.ഐ സുബ്രഹ്മണ്യ​​​െൻറ നേതൃത്വത്തിൽ പൊലീസ് സ്ഥലത്തെത്തി. അപകടത്തെ തുടർന്ന് ദേശീയപാതയിൽ ഗതാഗതം തടസ്സപ്പെട്ടു. ഭാഗ്യ പി.എസ്​.എം.ഒ കോളജ്​ പി.ജി വിദ്യാർഥിനിയാണ്​. മാതാവ്​: സജിത. സഹോദരി: കാവ്യ.