ഗർഭച്ഛിദ്രത്തിന്​ കൈക്കൂലി: വനിത ഡോക്​ടർക്ക്​ ഒന്നര വർഷം കഠിന തടവ്

മൂവാറ്റുപുഴ: ഗർഭച്ഛിദ്രം നടത്താൻ 1500 രൂപ കൈക്കൂലി വാങ്ങിയെന്ന കേസിൽ വനിത ഡോക്ടറെ മൂവാറ്റുപുഴ വിജിലൻസ് കോടതി ശിക്ഷിച്ചു. തൃപ്പൂണിത്തുറ സർക്കാർ ആശുപത്രിയിലെ ഡോക്ടറായിരുന്ന സാജിറ ഭാസിയെ ഒന്നരവർഷം കഠിനതടവിനും 25,000 രൂപ പിഴയടക്കാനുമാണ് ശിക്ഷിച്ചത്. 

2004ലാണ്​ കേസിനാസ്​പദമായ സംഭവമുണ്ടായത്​. മൂന്ന്​ കുട്ടികളുള്ള തിരുവാങ്കുളം സ്വദേശി ഓമന നാലാമതും ഗർഭിണിയായതിനെത്തുടർന്ന്​ ഭർത്താവിനൊപ്പം ഡോക്​ടറെ കാണാനെത്തി. ഗർഭച്ഛിദ്രം​ തേടിയപ്പോൾ 1500 രൂപ കൈക്കൂലി വേണമെന്നാവശ്യപ്പെട്ടു. ഇത്രയും പണമില്ലാതിരുന്നതിനാൽ ദമ്പതികൾ വിജിലന്‍സിന്​ പരാതി നൽകുകയായിരുന്നു. വിജിലൻസ് ഉദ്യോഗസ്ഥർ നൽകിയ പണം കൈമാറുന്നതിനി​െട ഡോക്ടറെ പിടികൂടി. 

കേസിൽ വ്യാഴാഴ്​ച വിചാരണ പൂർത്തിയാക്കിയാണ്​ കോടതിവിധി പറഞ്ഞത്. പിഴയടച്ചില്ലെങ്കിൽ മൂന്നുമാസംകൂടി തടവുശിക്ഷ അനുഭവിക്കണം. വാദിയായ സ്ത്രീയുൾപ്പെടെ കൂറുമാറിയെങ്കിലും പ്രോസിക്യൂഷൻ ശക്തമായ നിലപാട്​ സ്വീകരിച്ചു.