‘പാർട്ടിക്ക് ഒരു ചുക്കും ചെയ്യാൻ പറ്റാത്തത് പ്രതിഷേധാർഹം’

കൊച്ചി: കോഴിക്കോട്ട് രണ്ടു വിദ്യാർഥികളെ യു.എ.പി.എ ചുമത്തി അറസ്​റ്റ്​ ചെയ്ത സംഭവത്തിൽ സമൂഹ മാധ്യമങ്ങളിലും ശക്ത മായ പ്രതിഷേധവുമായി ഇടത് രാഷ്​ട്രീയ, സാമൂഹ്യ, കലാ, സാംസ്കാരിക പ്രവർത്തകർ രംഗത്ത്. സംവിധായകൻ ആഷിക് അബു ഉൾ​െപ്പടെ നിരവധി പേരാണ് കക്ഷിരാഷ്​ട്രീയ ഭേദമ​േന്യ സർക്കാർ നിലപാടിനെയും പൊലീസ് നടപടിയെയും രൂക്ഷമായി വിമർശിച്ച് രംഗത്ത െത്തിയത്. യു.എ.പി.എ കരിനിയമമാണ് എന്നതിൽ സി.പി.എമ്മിനോ കേരള സർക്കാറിനോ ഒരു സംശയവുമില്ലെന്നും കേസെടുത്തത് പൊലീസ് പുനഃപരിശോധിക്കണമെന്നും അറസ്​റ്റ്​ ദിവസം തന്നെ സി.പി.എം പി.ബി അംഗം എം.എ ബേബി ഫേസ്ബുക്ക് പോസ്​റ്റിലൂടെ ആവശ്യപ്പെട്ടിരുന്നു.

ഞായറാഴ്ച രാവിലെയാണ് സർക്കാറിനെതിരെ വിമർശനവുമായി ആഷിക് അബു രംഗത്തെത്തിയത്. ‘വാളയാർ കേസിലും മാവോയിസ്​റ്റ്​ വേട്ടയിലും ഒരു പത്രപ്രവർത്തകനെ ഭരണസിരാകേന്ദ്രത്തി​​െൻറ മൂക്കിന് താഴെ ഐ.എ.എസ് ഉദ്യോഗസ്ഥൻ കാറിടിച്ചുകൊന്നതിലും തെളിയുന്നത് പൊലീസ് ക്രിമിനലുകളുടെയും ബ്യൂറോക്രാറ്റുകളുടെയും മേൽ ഈ സർക്കാറിനും നിയന്ത്രണമില്ല എന്ന് തന്നെയാണെന്ന്’ അദ്ദേഹം ആഞ്ഞടിച്ചു. ഭരണകൂടഭീകരത ഏറെ അനുഭവിച്ച അനുയായികളുള്ള പാർട്ടിക്ക് ഈ കാര്യത്തിൽ ഒരു ചുക്കും ചെയ്യാൻ പറ്റാത്തത് അത്യന്തം പ്രതിഷേധാർഹമാണെന്നും ഇടത് രാഷ്​ട്രീയക്കാരനായ ആഷിക് അബു പറയുന്നു. അദ്ദേഹത്തി​​െൻറ അഭിപ്രായത്തെ പിന്തുണച്ച് നൂറുകണക്കിന് ഇടത് അനുഭാവികളാണ് പോസ്​റ്റിന്​ കീഴെ പ്രതികരിക്കുന്നത്. രണ്ടായിരത്തിേലറെ പേർ പങ്കുവെക്കുകയും ചെയ്തു.

അഭിഭാഷകനും പരിസ്ഥിതി പ്രവർത്തകനുമായ ഹരീഷ് വാസുേദവനും കടുത്ത വിമർശനമാണ് മുഖ്യമന്ത്രിക്കും പൊലീസിനുമെതിരെ ഉന്നയിക്കുന്നത്. പിണറായി വിജയ​​െൻറ തീരുമാനത്തി​​െൻറ അടിസ്ഥാനത്തിൽ കോഴിക്കോട്ടെ പൊലീസ് മേധാവിയായ എ.വി. ജോർജി​​െൻറ അനുമതിയോടെയാണ് യു.എ.പി.എ അറസ്​റ്റെന്ന് അദ്ദേഹം തുറന്നടിക്കുന്നു.

2015ൽ മാവോവാദി വിഷയത്തിൽ പൊലീസിനെ വിമർശിച്ച്​ ഹൈകോടതി നടത്തിയ പരാമർശത്തെ കുറിച്ച് അധികാരത്തിലേറും മുമ്പ് പിണറായി വിജയൻ എഴുതിയ ഫേസ്ബുക്ക് പോസ്​റ്റ്​ ഇപ്പോൾ എതിരാളികൾ വ്യാപകമായി പ്രചരിപ്പിക്കുന്നുണ്ട്. തീവ്രവാദത്തെ നേരിടുന്നതി​​െൻറ പേരിൽ പലപ്പോഴും അതിരുവിടുന്ന പൊലീസിന്​ ലഭിച്ച മുന്നറിയിപ്പാണ് കോടതിവിധിയെന്ന് പഴയ പോസ്​റ്റിൽ പറയുന്നു. ഈ നിലപാട് ഒലിച്ചുപോയോ എന്നാണ് പലരുടെയും ചോദ്യം.