കാഞ്ഞിരപ്പള്ളിയിൽ നിയന്ത്രണം വിട്ട കാർ കെട്ടിടത്തിലേക്ക് ഇടിച്ചുകയറി; യുവാവ് മരിച്ചു

കാഞ്ഞിരപ്പള്ളി: ദേശീയപാതയിൽ കാഞ്ഞിരപ്പള്ളി കുന്നുംഭാഗം ജനറൽ ആശുപത്രിപ്പടിയിൽ കാർ കെട്ടിടത്തിൽ ഇടിച്ചുകയറി യാത്രികനായ യുവാവ്​ മരിച്ചു. തമ്പലക്കാട് കീച്ചേരിൽ രാജ്മോഹൻ നായരുടെയും ഇന്ദിരയുടെയും മകൻ അഭിജിത്താണ്​ (33) മരിച്ചത്. ഗുരുതര പരിക്കേറ്റ തമ്പലക്കാട് ആലപ്പാട്ട് വയലിൽ വീട്ടിൽ ദീപു പാലായിലെ സ്വകാര്യ ആശുപത്രിയിൽ ചികിത്സയിലാണ്.

വെള്ളിയാഴ്ച രാത്രി 11.15ഓടെയാണ് അപകടം. കാഞ്ഞിരപ്പള്ളിയിൽനിന്ന്​ പൊൻകുന്നത്തിന് പോകുകയായിരുന്ന കാർ നിയന്ത്രണംവിട്ട് കെട്ടിടത്തിൽ ഇടിക്കുകയായിരുന്നു. അഭിജിത്തിന്‍റെ സഹോദരി ആതിര, ആതിരയുടെ ഭർത്താവ് തെക്കേത്തുകവല വെട്ടുവേലിയിൽ വിഷ്ണുപ്രസാദ്, വിഷ്ണുപ്രസാദിന്‍റെ ബന്ധു പ്രണവ് ബാബു, അഭിജിത്തിന്‍റെ അയൽവാസി ദീപു എന്നിവരാണ്​ കാറിൽ ഉണ്ടായിരുന്നത്. അപകടത്തിൽ എയർബാഗ് തുറന്നതിനാൽ മുൻസീറ്റിലിരുന്ന ആതിരയും വിഷ്ണുപ്രസാദും നിസ്സാര പരിക്കുകളോടെ രക്ഷപ്പെട്ടു.

വ്യാഴാഴ്ച ആതിരയുടെയും വിഷ്ണുപ്രസാദിന്‍റെയും വിവാഹമായിരുന്നു. ആതിരയുടെ വീട്ടിൽനിന്ന്​ വിഷ്ണുപ്രസാദിന്‍റെ ചിറക്കടവ് തെക്കേത്തുകവലയിലെ വീട്ടിലേക്ക് പോകുംവഴിയായിരുന്നു അപകടം. വിഷ്ണുപ്രസാദാണ്​ വാഹനം ഓടിച്ചിരുന്നത്. അഭിജിത്തിന്‍റെ സംസ്കാരം ശനിയാഴ്ച വൈകീട്ട്​ വീട്ടുവളപ്പിൽ നടത്തി. അഭിജിത് ബംഗളൂരുവിൽ ജോലിചെയ്യുകയായിരുന്നു.