കളിക്കുന്നതിനിടെ കോണിപ്പടിയിൽനിന്ന് വീണ് രണ്ടു വയസ്സുകാരിക്ക് ദാരുണാന്ത്യം

കോന്നി: കളിക്കുന്നതിനിടെ വീടിന്‍റെ പിന്നിലെ കോണിപ്പടിയിൽനിന്ന്​ വീണ് രണ്ടു വയസ്സുകാരിക്ക് ദാരുണാന്ത്യം. കോന്നി മാങ്കുളം പള്ളിമുരുപ്പേൽ ഷെബീർ - സബീന ദമ്പതികളുടെ മകൾ അഫ്റ മറിയം ആണ്​ മരിച്ചത്​. ശനിയാഴ്ച രാവിലെ 11.45 ഓടെയാണ്​ സംഭവം.

മാതാവ് വീടിനുപുറത്ത് വസ്ത്രങ്ങൾ അലക്കിക്കൊണ്ടിരിക്കുമ്പോൾ തൊട്ടുമുകളിൽ കോണിപ്പടി കയറി ചെല്ലുന്ന വീടിന്‍റെ ടെറസ്​ ഭാഗത്ത്​ അഫ്റ നിൽക്കുന്നതുകണ്ടു. താഴെ ഇറങ്ങി മുറിക്കുള്ളിലേക്ക് പോകാൻ മകളോട്​ ആവശ്യപ്പെട്ടു. കുഞ്ഞ്​ തിരികെ ഇറങ്ങാൻ ശ്രമിക്കുമ്പോഴാണ് കാൽവഴുതി വീണത്. ഗുരുതര പരിക്കേറ്റ കുഞ്ഞിനെ ഉടൻ കോന്നിയിലെ സ്വകാര്യ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. വീടിന് മുകളിലത്തെ നിലയില്‍ നിര്‍മാണ പ്രവര്‍ത്തനം നടന്നുവരുകയാണ്​. അപകടസമയത്ത് മാതാവ്​ സബീന മാത്രമാണ് വീട്ടിലുണ്ടായിരുന്നത്.

സൗദി അറേബ്യയിലെ അസറയിൽ ഡ്രൈവറാണ്​ പിതാവ് ഷെബീർ. അഫ്​റക്ക്​ ഒന്നരമാസം പ്രായമുള്ളപ്പോൾ നാട്ടിലെത്തി മടങ്ങിയതാണ്​. സഹോദരങ്ങൾ: അഥില ഫാത്തിമ, അഥീനാ ഫാത്തിമ. ഖബറടക്കം പിന്നീട്. അസ്വാഭാവിക മരണത്തിന്​ കോന്നി പൊലീസ്​ കേസെടുത്തു.