കൂട്ടിവായിക്കാൻ അറിയാത്തവർക്കും എ പ്ലസ്​; അഭിപ്രായങ്ങൾ വ്യക്തിപരമെന്ന്​ ഡയറക്ടറുടെ വിശദീകരണം

തിരുവനന്തപുരം: എസ്​.എസ്​.എൽ.സി പരീക്ഷയിൽ വാരിക്കോരി മാർക്ക്​ നൽകുന്നതും കൂട്ടിവായിക്കാൻ അറിയാത്തവർക്ക്​ പോലും എ പ്ലസ്​ ലഭിക്കുന്നുവെന്നതും അടക്കമുള്ള പരാമർശങ്ങൾ വ്യക്​തിപരമെന്ന് ​ പൊതുവിദ്യാഭ്യാസ ഡയറക്ടർ എസ്​. ഷാനവാസിന്‍റെ വിശദീകരണം. പൊതുവിദ്യാഭ്യാസ മന്ത്രി വി. ശിവൻകുട്ടിക്ക്​ നൽകിയ റിപ്പോർട്ടിലാണ്​ ഇക്കാര്യമുള്ളത്​. വകുപ്പിന്‍റെയോ സർക്കാറിന്‍റെയോ നയം എന്ന നിലയിൽ യോഗത്തിൽ ഒരു പരാമർശവും നടത്തിയിട്ടില്ല.

എസ്​.എസ്​.എൽ.സി പരീക്ഷയുടെ ചോദ്യപേപ്പർ തയാറാക്കാൻ വകുപ്പിലെ അധ്യാപകർ മാത്രം പ​ങ്കെടുത്ത ശിൽപശാലയിലായിരുന്നു പരാമർശങ്ങൾ. തീരുമാനങ്ങൾ എന്ന നിലക്കല്ല പറഞ്ഞത്​. വ്യക്തിപരമായ അഭിപ്രായങ്ങൾ പങ്കുവെക്കുകയാണ്​ ചെയ്തത്​. അത്​ ആരോ ഫോണിൽ റെക്കോഡ്​ ചെയ്​ത്​ പ്രചരിപ്പിക്കുകയായിരുന്നു. സർക്കാർ നയത്തെയോ മൂല്യ നിർണയ രീതിയേയോ തരം താഴ്ത്താൻ ഉദ്ദേശിച്ചിട്ടില്ലെന്ന്​ വിശദീകരണത്തിലുണ്ട്​.

നവംബർ 22 മുതൽ എസ്​.സി.ഇ.ആർ.ടിയിൽ നടന്ന ശിൽപശാലയുടെ ഉദ്​ഘാടന സെഷനിലായിരുന്നു വിവാദ പരാമർശങ്ങൾ. ഇക്കാര്യം പുറത്തുവന്നതോടെ മന്ത്രി വി. ശിവൻകുട്ടി റിപ്പോർട്ട്​ തേടിയിരുന്നു. പ്രസംഗം റെക്കോഡ്​ ചെയ്ത്​ ചോർത്തിയത്​ സംബന്ധിച്ച്​ വകുപ്പുതല അന്വേഷണത്തിന്​ പൊതുവിദ്യാഭ്യാസ പ്രിൻസിപ്പൽ സെക്രട്ടറി റാണി ജോർജിനും മന്ത്രി നിർദേശം നൽകി​.