വെട്ടേറ്റ് ചത്ത പുള്ളിപ്പുലിയെ സംസ്കരിച്ചു

അടിമാലി: ആദിവാസി യുവാവ് സ്വയരക്ഷക്കായി വാക്കത്തികൊണ്ട് വെട്ടിക്കൊലപ്പെടുത്തിയ പുള്ളിപ്പുലിയെ വനം വകുപ്പ് സംസ്കരിച്ചു. മാങ്കുളം റേഞ്ച് ഓഫിസിൽ സൂക്ഷിച്ച പുലിയുടെ ജഡം ഇൻക്വസ്റ്റ് നടപടികൾക്ക് ശേഷം ഞായറാഴ്ച വൈകീട്ട്​​ 3.30നാണ് ദഹിപ്പിച്ചത്.

മൂന്നാർ ഡി.എഫ്.ഒ രാജു കെ. ഫ്രാൻസിസ്, മാങ്കുളം ഡി.എഫ്.ഒ ജി. ജയചന്ദ്രൻ, അസി. ഫോറസ്റ്റ് വെറ്ററിനറി സർജൻമാരായ ഡോ. നിഷ റേച്ചൽ (മൂന്നാർ), ഡോ. അനുമോദ്​ (​കോട്ടയം), തേക്കടി കൺസർവേറ്റർ ബയോളജിസ്റ്റ് രമേശ് ബാബു, പാലാ സെന്റ് തോമസ് കോളജിലെ സുവോളജി വിഭാഗം തലവൻ മാത്യു തോമസ്, മാങ്കുളം പഞ്ചായത്ത്​ അംഗം അനിൽ ആന്റണി, മാങ്കുളം റേഞ്ച് ഓഫിസർ വി. പ്രസാദ് കുമാർ എന്നിവരടങ്ങിയ പ്രത്യേക കമ്മിറ്റിയാണ് പോസ്റ്റ്​മോർട്ടം നടപടി പൂർത്തിയാക്കിയത്.

വന്യജീവി സംരക്ഷണ നിയമത്തിൽ സ്വയംപ്രതിരോധമെന്ന ചട്ടം ഉൾപ്പെടുന്നതിനാൽ പുലിയെ വെട്ടിക്കൊന്നത്​ സംബന്ധിച്ച കേസ് ഒഴിവാക്കിയാണ് വനം വകുപ്പിന്റെ നടപടി. പുലിയുടെ ആക്രമണത്തിൽ പരിക്കേറ്റ മാങ്കുളം ചിക്കണംകുടി ആദിവാസി കോളനിയിലെ ഗോപാലൻ അടിമാലി താലൂക്ക്​ ആശുപത്രിയിൽ ചികിത്സയിലാണ്. ഇദ്ദേഹത്തിന്‍റെ ആരോഗ്യനില മെച്ചപ്പെട്ടതായി ആശുപത്രി അധികൃതർ പറഞ്ഞു. ചികിത്സക്ക് ആവശ്യമായ ചെലവ്​ വനം വകുപ്പാണ് വഹിക്കുന്നത്.