16കാരിയെ പീഡിപ്പിച്ച 55കാരന് ഏഴ്​ വർഷം കഠിനതടവും 40,000 രൂപ പിഴയും

തിരുവനന്തപുരം: പതിനാറുകാരിയെ പീഡിപ്പിച്ച കേസിൽ പ്രതിക്ക്​ ഏഴ്​ വർഷം കഠിനതടവും 40,000 രൂപ പിഴയും. കോട്ടയ്ക്കകം പുത്തൻതെരുവിൽ ചിന്ന ദുരൈയെയാണ് (55) ​തിരുവനന്തപുരം അതിവേഗ സ്പെഷൽ കോടതി ജഡ്ജി ശിക്ഷിച്ചത്​. പിഴ അടച്ചില്ലെങ്കിൽ ഒരു വർഷവും മൂന്ന് മാസവും കൂടുതൽ ശിക്ഷ അനുഭവിക്കണമെന്നും ജഡ്ജി ആജ് സുദർശൻ വിധിയിൽ പറഞ്ഞു. പിഴയായി ഈടാക്കുന്ന തുകയിൽ 30,000 രൂപ പെൺകുട്ടിക്ക് നൽകണം.

2020 ഏപ്രിൽ 24 നായിരുന്നു കേസിനാസ്പദമായ സംഭവം. പ്രോസിക്യൂഷന് വേണ്ടി സ്പെഷൽ പബ്ലിക്​ പ്രോസിക്യൂട്ടർ ആർ.എസ്.വിജയ് മോഹൻ ഹാജരായി. ഫോർട്ട് എസ്.ഐമാരായിരുന്ന എസ്. വിമൽ, സജു എബ്രഹാം എന്നിവരാണ് അന്വേഷണം നടത്തിയത്.