90 മണിക്കൂർ ജോലി: അപലപിച്ച്​ ബെഫി

തൃശൂർ: ​ജോലി സമയം ആഴ്ചയിൽ 90 മണിക്കൂർ ആക്കണമെന്നും ഞായറാഴ്ച കൂടി പ്രവൃത്തി ദിനം ആക്കണമെന്നുമുള്ള ലാർസൻ ആന്‍റ്​ ടൂബ്രോ (എൽ ആന്‍റ്​ ടി) ചെയർമാൻ എസ്​.എൻ. സുബ്രഹ്​മണ്യന്‍റെ പ്രസ്താവ​നയെ ശക്തിയായി അപലപിച്ച്​ ബാങ്ക്​ എംപ്ലോയീസ്​ ഫെഡറേഷൻ ഓഫ്​ ഇന്ത്യ (ബെഫി).

ആഴ്ചയിൽ അഞ്ച്​ പ്രവൃത്തി ദിനവും ദിവസം ഏഴ്​ മണിക്കൂർ ജോലിയുമെന്ന വേൾഡ്​ ഫെഡറേഷൻ ഓഫ്​ ട്രേഡ്​ യൂനിയൻസിന്‍റെ ആവശ്യത്തെ ബെഫി പിന്താങ്ങുന്നതായി ദേശീയ സെക്രട്ടറി എസ്​. ഹരി റാവു വാർത്തകുറിപ്പിൽ പറഞ്ഞു. എൽ ആന്‍റ്​ ടിയിലെ ഉദ്യോഗസ്ഥർ വാങ്ങുന്നതിന്‍റെ 500 മടങ്ങ്​, 51 കോടി രൂപ വേതന പാക്കേജുള്ളയാളാണ്​ ചെയർമാൻ. ആഴ്ചയിൽ 70 മണിക്കൂർ ജോലിയെന്ന പ്രസ്താവന മുമ്പ്​ ഇൻഫോസിസിന്‍റെ എം.ആർ. നാരായണമൂർത്തിയും പറഞ്ഞിട്ടുണ്ട്​.

തൊഴിൽ-ജോലി സന്തുലനം നഷ്ടപ്പെട്ട്​ ഏണസ്റ്റ്​ ആന്‍റ്​ യങിലെ അന്ന സെബാസ്റ്റ്യനും എച്ച്​.ഡി.എഫ്​.സിയിലെ സദ ഫാത്തിമയും ഉൾപ്പടെ നിരവധി​പേർ സമീപകാലത്ത് മരിക്കുകയോ ആത്മഹത്യ ചെയ്യുകയോ ചെയ്തു. ​അഭ്യസ്തവിദ്യരായ ​ചെറുപ്പക്കാർക്കിടക്ക്​ തൊഴിലില്ലായ്മ വ്യാപകമാവുമ്പോൾ അവരുടെ വിയർപ്പും രക്തവും പരമാവധി ചൂഷണം ചെയ്യുന്ന കോർപറേറ്റുകളുടെ താൽപര്യത്തിന്​ അനുസരിച്ചാണ്​ ഭരണ സംവിധാനം പ്രവർത്തിക്കുന്നത്​. തമിഴ്​നാട്ടിൽ സാംസങ്​ ജീവനക്കാരുടെ പണിമുടക്കിൽ ഇത്​ വ്യക്തമായതാണ്​.

സ്ഥിരം​​ ജോലി കരാർവത്​കരിക്കൽ, അതിന്​ കുറഞ്ഞ വേതനം എന്നിവ ഒരു ഭാഗത്ത്​ നടക്കുമ്പോൾ സ്ഥിരം ജോലിക്കാരെ സമയവും ദിവസവും നോക്കാതെ പണിയെടുപ്പിക്കുന്നത്​ ബാങ്കിങ്​ മേഖലയിൽ അടക്കം കൂടിവരികയാണ്​. ബാങ്കുകളിൽ ജീവനക്കാരുടെ ക്ഷാമം രൂക്ഷമാകുമ്പോൾ ഇത്തരം ​ചൂഷണത്തിലൂടെയാണ്​ സ്ഥാപനങ്ങൾ മുന്നോട്ട്​ കൊണ്ടുപോകുന്നത്​.

കഴിഞ്ഞ വർഷം മാർച്ചിൽ നടന്ന ബാങ്ക്​ വേതന പരിഷ്കരണ ഉഭയകക്ഷി ചർച്ചയിൽ തൊഴിൽ-ജോലി സന്തുലനം നഷ്ടപ്പെടുന്നത്​ ബെഫി ചൂണ്ടിക്കാണിച്ചിരുന്നു. ആ ധാരണാപത്രം ഒപ്പിട്ട്​ 10 മാസം കഴിഞ്ഞിട്ടും ആഴ്ചയിൽ അഞ്ച്​ പ്രവൃത്തി ദിനം നടപ്പാക്കാത്തത്​ ദയനീയമാണ്​. എൽ ആന്‍റ്​ ടി ചെയർമാന്‍റെ മനുഷ്യത്വരഹിതവും പുരുഷാധിപത്യ-സ്​ത്രീവിരുദ്ധവുമായ പ്രസ്താവന അപലപിക്കപ്പെടേണ്ടതാണെന്നും ഹരി റാവു പറഞ്ഞു.