മുസ്‍ലിം ലീഗ് ദേശീയ ആസ്ഥാനത്തിനായി സംസ്ഥാന കമ്മിറ്റി സമാഹരിച്ചത് 26 കോടിയിലധികം രൂപ

മലപ്പുറം: മുസ്‍ലിം ലീഗ് ഡല്‍ഹിയില്‍ ആരംഭിക്കുന്ന ദേശീയ ആസ്ഥാനത്തിന് വേണ്ടി സംസ്ഥാന കമ്മിറ്റി സംഘടിപ്പിച്ച ഓൺലൈൻ ധനസമാഹരണത്തിൽ 26 കോടിയിലധികം രൂപ സമാഹരിച്ചു. 26,77,58,592 രൂപയാണ് ഒരുമാസം നീണ്ട കാമ്പയിനിൽ സമാഹരിച്ചത്.

25 കോടിയായിരുന്നു പ്രഖ്യാപിതലക്ഷ്യം. കാമ്പയിന്റെ സമാപനം ചൊവ്വാഴ്ച രാത്രി മലപ്പുറത്ത് നടന്നു. അവസാന നിമിഷം ഓൺലൈൻ അക്കൗണ്ടിലേക്ക് പണമൊഴുകുന്ന വേളയിൽ നേതാക്കൾ ആഹ്ലാദം പങ്കുവെച്ചു. മുസ്‍ലീം ലീഗ് പ്രവർത്തകരുടെ ആവേശത്തിന് ഒരുകാലത്തും ഇടിവ് സംഭവിച്ചിട്ടില്ലെന്നതിന് തെളിവാണ് ഈ വിജയമെന്ന് പി.കെ. കുഞ്ഞാലിക്കുട്ടി പറഞ്ഞു.