ബി.ജെ.പി ഓഫിസ് ആക്രമണം: അക്രമിയുടെ ദൃശ്യം പുറത്ത്

തിരുവനന്തപുരം: ബി.ജെ.പിയുടെ സംസ്ഥാന കമ്മിറ്റി ഓഫീസിന് നേരെ ഇന്നലെ രാത്രി ആക്രമണം നടത്തിയയാളുടെ ദൃശ്യം പുറത്ത്. ഓഫിസിന് സമീപത്തുള്ള വീട്ടിലെ സി.സി. ടി.വിയിലാണ് ദൃശ്യം പതിഞ്ഞത്. എന്നാൽ, ഒരു വശത്തു നിന്നുള്ള ദൃശ്യം മാത്രമാണ് പുറത്തുവന്നിട്ടുള്ളത്​. അതിനാൽ തന്നെ അക്രമിയുടെ രൂപം വ്യക്തമല്ല. ബൈക്കിലെത്തിയ ഒരാൾ സ്ഫോടകവസ്തു എറിയുന്നതും അക്രമി ബൈക്കില്‍ കടന്നുപോകുന്നതുമായ ദൃശ്യങ്ങളാണ് പുറത്തുവന്നത്.

സ്ഥലത്ത് ഫെറൻസിക് വിദഗ്ധർ പരിശോധന നടത്തി. സ്‌ഫോടനത്തിനുപയോഗിച്ച സ്‌ഫോടക വസ്തുവിന്‍റെ അവശിഷ്ടങ്ങള്‍ പൊലീസ് ശേഖരിച്ചിട്ടുണ്ട്.

തിരുവനന്തപുരം കുന്നുകുഴിയിലെ ബി.ജെ.പി ഓഫിസിന്​ നേരെ ബുധനാഴ്ച രാത്രി 12 മണിയോടെയാണ്​ ആക്രമണമുണ്ടായത്. ആര്‍ക്കും പരിക്കില്ല. ബൈക്കിലെത്തിയ രണ്ടു പേര്‍ നാടന്‍ ബോംബ് എറിയുകയായിരുന്നുവെന്നാണ്​ ഓഫിസ്​ ജീവനക്കാര്‍ പറയുന്നത്​. ശബ്ദംകേട്ട് ഓഫീസിലുള്ളവര്‍ പുറത്തിറങ്ങിയപ്പോഴേക്കും അക്രമി സംഘം രക്ഷപ്പെട്ടിരുന്നു. അക്രമത്തിന് പിന്നില്‍ സി.പി.എം ആണെന്ന് ബി.ജെ.പി ആരോപിച്ചു.