അഞ്ജു രാജി വെച്ചത് നന്നായെന്ന് ഇ.പി ജയരാജൻ

തിരുവനന്തപുരം: അഞ്ജു ബോബി ജോർജ് സംസ്ഥാന സ്പോർട്സ് കൗൺസിൽ പ്രസിഡന്‍റ് സ്ഥാനം രാജി വെച്ചത് വളരെ നന്നായെന്ന് കായിക മന്ത്രി ഇ. പി ജയരാജൻ. അവരോട് ആരും രാജി ആവശ്യപ്പെട്ടിട്ടില്ല. അഴിമതി കഥകൾ മാധ്യമങ്ങളിലൂടെ പുറത്തുവന്നപ്പോൾ നിവൃത്തിയില്ലാതെയാണ് രാജിവെച്ചത്. വിജിലൻസ് അന്വേഷണം വേണോ എന്ന കാര്യം പിന്നീട് തീരുമാനിക്കുമെന്നും ജയരാജൻ തിരുവനന്തപുരത്ത് മാധ്യമങ്ങളോട് പറഞ്ഞു.

ബുധനാഴ്ച ചേർന്ന സ്പോർട്സ് കൗൺസിൽ ഭരണസമിതി യോഗത്തിലാണ് അഞ്ജു രാജി പ്രഖ്യാപിച്ചത്. അഞ്ജുവിനെ കൂടാതെ വോളിബാൾ താരം ടോം ജോസഫ് അടക്കമുള്ള ഭരണസമിതിയിലെ 12 അംഗങ്ങളും രാജിവെച്ചിട്ടുണ്ട്. അപമാനം സഹിച്ച് പ്രസിഡന്‍റ് പദവിയിൽ തുടരാൻ ആഗ്രഹിക്കുന്നില്ലെന്നും അവർ പറഞ്ഞിരുന്നു.