നാല് ട്രെയിനുകള്‍ റദ്ദാക്കി; സിഗ്നലിങ് പ്രവൃത്തി ഇന്ന് തീര്‍ന്നേക്കും

പാലക്കാട്: ജങ്ഷന്‍ റെയില്‍വേ സ്റ്റേഷനില്‍ സിഗ്നലിങ് പ്രവൃത്തി പുരോഗമിക്കുന്നതിനാല്‍ വെള്ളിയാഴ്ച നാല് ട്രെയിനുകള്‍ റദ്ദാക്കി. രാവിലെ 7.20നുള്ള പാലക്കാട്-കോയമ്പത്തൂര്‍ മെമു, വൈകീട്ട് 6.10നുള്ള കോയമ്പത്തൂര്‍-പാലക്കാട് ടൗണ്‍ മെമു, ഉച്ചക്കുശേഷം 2.50നുള്ള ഷൊര്‍ണൂര്‍-കോയമ്പത്തൂര്‍ മെമു, രാവിലെ 9.45നുള്ള കോയമ്പത്തൂര്‍-ഷൊര്‍ണൂര്‍ മെമു എന്നിവയാണ് റദ്ദാക്കിയത്. പുലര്‍ച്ചെ 5.45നുള്ള കണ്ണൂര്‍-കോയമ്പത്തൂര്‍ ഫാസ്റ്റ് പാസഞ്ചര്‍ ഷൊര്‍ണൂര്‍ വരെ മാത്രമേ ഓടൂ. ഉച്ചക്കുശേഷം 2.10നുള്ള കോയമ്പത്തൂര്‍-കണ്ണൂര്‍ ഫാസ്റ്റ് കോയമ്പത്തൂരിനും ഷൊര്‍ണൂരിനും ഇടയില്‍ ഓടില്ല. വൈകീട്ട് 4.20ന് ഷൊര്‍ണൂരില്‍നിന്നാണ് ഇത് സര്‍വിസ് ആരംഭിക്കുക.

രാവിലെ 7.30നുള്ള കോയമ്പത്തൂര്‍-മാംഗ്ളൂര്‍ ഫാസ്റ്റ് പാസഞ്ചര്‍ കോയമ്പത്തൂരിനും കോഴിക്കോടിനും ഇടയില്‍ ഭാഗികമായി റദ്ദാക്കി. ഇത് കോഴിക്കോട്ടുനിന്ന് ഉച്ചക്ക് ഒന്നിന് ഓട്ടം തുടങ്ങും. രാവിലെ 7.40നുള്ള മാംഗ്ളൂര്‍-കോയമ്പത്തൂര്‍ ഫാസ്റ്റ് കോഴിക്കോട് വരെ മാത്രമേ സര്‍വിസ് നടത്തൂ. ഉച്ചക്ക് 2.30നുള്ള പാലക്കാട് ടൗണ്‍-ഈറോഡ് മെമു പാലക്കാടിനും കോയമ്പത്തൂരിനും ഇടയില്‍ റദ്ദാക്കി. ഈ ട്രെയിന്‍ വൈകീട്ട് 4.10ന് കോയമ്പത്തൂര്‍ ജങ്ഷനില്‍നിന്ന് സര്‍വിസ് തുടങ്ങും. രാവിലെ 7.45നുള്ള ഈറോഡ്-പാലക്കാട് ടൗണ്‍ മെമു കോയമ്പത്തൂര്‍ ജങ്ഷന്‍ വരെ മാത്രമേ ഓടൂ. പ്രവൃത്തി വെള്ളിയാഴ്ച പൂര്‍ത്തിയാക്കാനായാല്‍ ശനിയാഴ്ച മുതല്‍ സര്‍വിസ് സാധാരണ പോലെയാകുമെന്ന് റെയില്‍വേ അറിയിച്ചു.