ക്ലിഫ് ഹൗസിൽ എ ഗ്രൂപ്പ് നേതാക്കൾ യോഗം ചേർന്നു

തിരുവനന്തപുരം: മുഖ്യമന്ത്രിയുടെ ഒൗദ്യോഗിക വസതിയായ ക്ലിഫ് ഹൗസിൽ എ ഗ്രൂപ്പ് നേതാക്കൾ യോഗം ചേർന്നു. മന്ത്രി കെ.സി ജോസഫ്, കെ. ബാബു, ബെന്നി ബെഹനാൻ എം.എൽ.എ, കെ.പി.സി.സി ജനറൽ സെക്രട്ടറി തമ്പാനൂർ രവി അടക്കമുള്ള കോൺഗ്രസ് എ വിഭാഗം നേതാക്കൾ യോഗത്തിൽ പങ്കെടുക്കുന്നുണ്ട്. കൂടാതെ കൃഷി മന്ത്രി കെ.പി മോഹനനും ക്ലിഫ് ഹൗസിലെത്തിയിട്ടുണ്ട്. ക്ലിഫ് ഹൗസിലെ യോഗം ഇപ്പോഴും തുടരുകയാണ്.

നെടുമ്പാശേരി വിമാനത്താവളത്തിലെ വി.ഐ.പി ലോഞ്ചിൽ നടത്തിയ കൂടിക്കാഴ്ചക്ക് ശേഷമാണ് എ വിഭാഗം നേതാക്കൾ രാത്രി ക്ലിഫ് ഹൗസിൽ വീണ്ടും യോഗം ചേരുന്നത്. സോളാർ കേസിൽ മുഖ്യമന്ത്രിക്കും മന്ത്രി ആര്യാടൻ മുഹമ്മദിനും എതിരെ എഫ്.ഐ.ആർ രജിസ്റ്റർ ചെയ്യാൻ തൃശൂർ വിജിലൻസ് കോടതി ഉത്തരവിട്ട സാഹചര്യത്തിലുള്ള എ വിഭാഗം യോഗത്തിന് വലിയ രാഷ്ട്രീയ പ്രാധാന്യമുണ്ട്.

വിജിലൻസ് കോടതി ഉത്തരവിനെ കുറിച്ച് നെടുമ്പാശേരിയിൽവെച്ച് അഡ്വക്കേറ്റ് ജനറലുമായി ഉമ്മൻചാണ്ടി ചർച്ച നടത്തിയിരുന്നു. മന്ത്രി ആര്യാടൻ മുഹമ്മദും കെ. ബാബുവും ബെന്നി ബെഹനാനും ഈ ചർച്ചയിൽ പങ്കെടുത്തു. തുടർന്ന് വിജിലൻസ് കോടതി ഉത്തരവിനെതിരെ സ്വകാര്യ അപ്പീൽ നൽകാൻ തീരുമാനിച്ചതായി മുഖ്യമന്ത്രി മാധ്യമങ്ങളോട് പറഞ്ഞിരുന്നു.