ശമ്പളം വര്‍ധിപ്പിച്ചില്ളെങ്കില്‍ ശക്തമായ സമരം -കെ.പി. രാജേന്ദ്രന്‍

മൂന്നാര്‍: തൊഴിലാളികളുടെ ശമ്പളം വര്‍ധിപ്പിച്ചില്ളെങ്കില്‍ ശക്തമായ സമരം സംഘടിപ്പിക്കുമെന്ന് എ.ഐ.ടി.യു.സി സംസ്ഥാന ജനറല്‍ സെക്രട്ടറി  കെ.പി. രാജേന്ദ്രന്‍.  മൂന്നാറില്‍ നടന്ന ജനറല്‍ ബോഡി യോഗം ഉദ്ഘാടനം ചെയ്യുകയായിരുന്നു അദ്ദേഹം.
മൂന്നാറിലെ കണ്ണന്‍ ദേവന്‍ കമ്പനിയിലെ സ്ത്രീ തൊഴിലാളികള്‍ നടത്തിയ സമരം പാര്‍ട്ടി അംഗീകരിക്കുന്നു. തൊഴിലാളികളുടെ പ്രശ്നങ്ങള്‍ പരിഹരിക്കുന്നതില്‍ മൂന്നാറിലെ യൂനിയനുകള്‍ക്ക് തെറ്റുപറ്റി. ആയിരക്കണക്കിനു തൊഴിലാളികളാണ് കമ്പനിയുടെ തോട്ടങ്ങളില്‍ ജോലി ചെയ്യുന്നത്. കമ്പനിയുടമകള്‍ തൊഴിലാളികളെ ചൂഷണം ചെയ്തു കോടികള്‍ കൊയ്യുകയാണ്. തൊഴിലാളികള്‍ താമസിക്കുന്ന ലയങ്ങളില്‍ അടിസ്ഥാനസൗകര്യം ഒരുക്കാനോ ചികിത്സ നല്‍കാനോ കമ്പനിയുടമകള്‍ നടപടി സ്വീകരിക്കുന്നില്ല. കമ്പനിയുടെ പിണിയാളുകളായി സര്‍ക്കാര്‍ പ്രവര്‍ത്തിച്ചാല്‍ തൊഴിലാളികള്‍ പ്രതിസന്ധിയിലാകും.
തൊഴിലാളികളുടെ വികാരങ്ങള്‍ മനസ്സിലാക്കി യൂനിയനുകള്‍ പ്രവര്‍ത്തിക്കണമെന്നും അദ്ദേഹം പറഞ്ഞു.