'കേരളീയം കൊച്ചി മെട്രോ: പുതിയ ലോഗോ പ്രകാശനം ചെയ്തു

നെടുമ്പാശ്ശേരി: കൊച്ചി മെട്രോ കോച്ചുകളുടെ ഡിസൈനും ലോഗോയും മുഖ്യമന്ത്രി ഉമ്മന്‍ ചാണ്ടി പ്രകാശനം ചെയ്തു. ഡിസൈനുകളടങ്ങിയ ആല്‍ബം മന്ത്രി ആര്യാടന്‍ മുഹമ്മദ്  മുഖ്യമന്ത്രിയില്‍നിന്ന് ഏറ്റുവാങ്ങി. മെട്രോ നിര്‍മാണ പുരോഗതിയില്‍ സര്‍ക്കാറിന് പൂര്‍ണ തൃപ്തിയാണുള്ളതെന്ന് ചടങ്ങില്‍ മുഖ്യമന്ത്രി പറഞ്ഞു. ഏതൊരു പദ്ധതിയും പരമാവധി വൈകിപ്പിക്കുന്നതില്‍ കേരളം മുന്നിലാണെന്ന ദുഷ്പേര് മാറാന്‍ പദ്ധതി സഹായകമാകുമെന്നും അദ്ദേഹം പറഞ്ഞു.
മൂന്നു കോച്ചുകളാണ് ട്രെയിനിനുണ്ടാകുക. യാത്രക്കാര്‍ക്ക് മൊബൈല്‍ ചാര്‍ജ് ചെയ്യാനുള്ള യു.എസ്.ബി കോഡുകളടക്കമുള്ള സൗകര്യങ്ങളും കോച്ചുകളില്‍ ലഭ്യമാക്കും. ആറ് എല്‍.എസ്.ഡി സ്ക്രീനുകളില്‍ വിവിധ സന്ദേശങ്ങള്‍ അറിയിക്കും. ഡിജിറ്റല്‍ റൂട്ട് മാപ്പടക്കമുള്ള അത്യാധുനിക സൗകര്യങ്ങളും ഒരുക്കും.