കൊച്ചി മെട്രോ നിര്‍മാണസ്ഥലം മുഖ്യമന്ത്രി സന്ദര്‍ശിച്ചു

കൊച്ചി: മെട്രോ നിര്‍മാണസ്ഥലം മുഖ്യമന്ത്രി ഉമ്മന്‍ചാണ്ടിയുടെ നേതൃത്വത്തിലുള്ള സംഘം സന്ദര്‍ശിച്ചു. നിര്‍മാണപ്രവൃത്തികള്‍ നേരിട്ട് വിലയിരുത്തുന്നതിനായി ആലുവ മുട്ടം യാര്‍ഡിലാണ് മുഖ്യമന്ത്രി സന്ദര്‍ശനം നടത്തിയത്. കൊച്ചി മെട്രോയുടെ മുഖ്യ ഉപദേഷ്ടാവ് ഇ. ശ്രീധരന്‍, മന്ത്രിമാരായ ആര്യാടന്‍ മുഹമ്മദ്, വി.കെ ഇബ്രാഹിംകുഞ്ഞ്, കെ. ബാബു, കൊച്ചി മേയര്‍ ടോണി ചമ്മിണി, കെ.എം.ആര്‍.എല്‍ എം.ഡി ഏലിയാസ് ജോര്‍ജ്, ബെന്നി ബെഹനന്‍ എം.എല്‍.എ എന്നിവരും മുഖ്യമന്ത്രിയോടൊപ്പമുണ്ടായിരുന്നു. ഇതിനുശേഷം ലൈറ്റ് മെട്രോ പദ്ധതിയുള്‍പ്പടെയുള്ള കാര്യങ്ങള്‍ ഇ. ശ്രീധരനുമായി ചര്‍ച്ച ചെയ്യാന്‍ നെടുമ്പാശ്ശേരിയില്‍ മുഖ്യമന്ത്രിയുടെ അധ്യക്ഷതയില്‍ യോഗം ചേരുന്നുണ്ട്.

ലൈറ്റ് മെട്രോയുമായി ബന്ധപ്പെട്ട് വിവിധ വിഷയങ്ങള്‍ ചൂണ്ടിക്കാട്ടി ഇ. ശ്രീധരന്‍ സര്‍ക്കാറിന് കത്തയച്ചിരുന്നു. ഈ കത്ത് ബുധനാഴ്ച ചേര്‍ന്ന മന്ത്രിസഭാ യോഗം ചര്‍ച്ച ചെയ്തു. ലൈറ്റ് മെട്രോ പദ്ധതിയുടെ നടപടികളില്‍ അവ്യക്തത ഉണ്ടെന്ന് ശ്രീധരന്‍െറ കത്തിലുണ്ടെന്ന് മുഖ്യമന്ത്രി സൂചിപ്പിച്ചിരുന്നു.  കൊച്ചി മെട്രോയുടെ ഒൗദ്യോഗിക ലോഗോ പ്രകാശനവും ഇന്ന് നടക്കും.