പാലിയേക്കരയില്‍ ടോള്‍ നിരക്ക് കുറച്ചു

ആമ്പല്ലൂര്‍: മണ്ണുത്തി -ഇടപ്പള്ളി ദേശീയപാതയില്‍ പാലിയേക്കരയിലെ ടോള്‍ നിരക്ക് കുറച്ചു. പുതുക്കിയ നിരക്ക് തിങ്കളാഴ്ച അര്‍ധരാത്രി നിലവില്‍ വന്നു. ബസ്, ട്രക്ക്, ബഹുചക്ര വാഹനങ്ങള്‍ എന്നിവയുടെ നിരക്ക് അഞ്ച് മുതല്‍ 15 രൂപ വരെയാണ് കുറച്ചത്. അതേസമയം, കാര്‍, ജീപ്പ്, ചെറുകിട വാഹനങ്ങള്‍ എന്നിവയുടെ നിരക്ക് കുറച്ചിട്ടില്ല. കേന്ദ്ര ധനകാര്യ വാണിജ്യ മന്ത്രാലയം പുറത്തിറക്കിയ മൊത്തവില സൂചികയിലെ വ്യതിയാനമാണ് ടോള്‍ നിരക്ക് കുറക്കാന്‍ കാരണം. പുതുക്കിയ നിരക്ക് ടോള്‍പ്ളാസയില്‍ പരസ്യപ്പെടുത്തിയിട്ടുണ്ട്.
ബഹുചക്ര വാഹനങ്ങള്‍ക്ക് ഒരുവശത്തേക്ക് 375 രൂപയില്‍നിന്ന് 365 രൂപയായും ഇരുവശങ്ങളിലേക്ക് 565 രൂപയില്‍ നിന്ന് 550 രൂപയായും കുറഞ്ഞു. ബസ്, ട്രക്ക് എന്നിവക്ക് ഒരുവശത്തേക്ക് 235 രൂപയായിരുന്നത് അഞ്ചുരൂപ കുറഞ്ഞു.
ഇരുവശങ്ങളിലേക്കുള്ള യാത്രക്ക് 10 രൂപ കുറഞ്ഞ് 340 രൂപയായി. ചെറുകിട ഭാരവാഹനങ്ങള്‍ക്ക് ഒരുവശത്തേക്കുള്ള യാത്രക്ക് നിരക്കില്‍ മാറ്റമില്ല. ഇരുവശത്തേക്കുമുള്ളത് അഞ്ച് രൂപ കുറഞ്ഞ് 170 രൂപയായി.