കേരളം ഭരിക്കാന്‍ പോകുന്നത് എസ്.എന്‍.ഡി.പി യോഗം -തുഷാര്‍ വെള്ളാപ്പള്ളി

ആലുവ: ഇനി കേരളം ഭരിക്കാന്‍ പോകുന്നത് എസ്.എന്‍.ഡി.പി യോഗം രൂപവത്കരിക്കുന്ന പാര്‍ട്ടിയായിരിക്കുമെന്ന്  എസ്.എന്‍.ഡി.പി വൈസ് പ്രസിഡന്‍റ് തുഷാര്‍ വെള്ളാപ്പള്ളി പറഞ്ഞു. എസ്.എന്‍.ഡി.പി യോഗം ആലുവ യൂനിയന്‍ പ്രവര്‍ത്തക കണ്‍വെന്‍ഷന്‍ ഉദ്ഘാടനം ചെയ്യുകയായിരുന്നു അദ്ദേഹം. ഇത് തിരിച്ചറിഞ്ഞ ഇടത്-വലത് മുന്നണികള്‍ യോഗം നേതാക്കളെ വ്യക്തിഹത്യ നടത്തി പിന്തിരിപ്പിക്കാന്‍ ശ്രമിക്കുകയാണ്.
പതിറ്റാണ്ടുകളായി ഇരുമുന്നണിക്കും വേണ്ടി ഈഴവസമുദായം വിടുപണി ചെയ്യുകയാണ്. തിരിച്ചറിവില്‍നിന്ന് പാഠം ഉള്‍ക്കൊണ്ട് പ്രവര്‍ത്തിക്കാന്‍ ശ്രമിക്കുമ്പോള്‍ യോഗം നേതാക്കളെയും പ്രവര്‍ത്തകരെയും പേടിപ്പിച്ച് രാജ്യത്തുനിന്ന് ഓടിക്കാനാണ് ശ്രമം. ഒരടി പിന്നോട്ടുവെച്ചാല്‍ പത്തടി മുന്നോട്ടുവെക്കാനുള്ള ശേഷി ഇന്ന് ഈഴവ സമുദായത്തിനുണ്ട്. ഇരുമുന്നണിയും ഈഴവസമുദായത്തിനെതിരെ യുദ്ധം പ്രഖ്യാപിച്ചിരിക്കുകയായാണെന്നും തുഷാര്‍ പറഞ്ഞു.