പ്രധാനമന്ത്രി വര്‍ഗീയവാദികള്‍ക്ക് കുടപിടിക്കുന്നു -സുധീരന്‍

തിരുവനന്തപുരം: രാജ്യത്തെ വര്‍ഗീയവാദികള്‍ക്ക് കുടപിടിക്കുന്ന സമീപനമാണ് പ്രധാനമന്ത്രി നരേന്ദ്ര മോദിയുടേതെന്ന് കെ.പി.സി.സി പ്രസിഡന്‍റ് വി.എം.സുധീരന്‍. രാജ്യത്തെ എല്ലാ വിഭാഗം ജനങ്ങളുടെയും സുരക്ഷ ഉറപ്പുവരുത്തേണ്ട ചുമതല പ്രധാനമന്ത്രിക്കുണ്ട്. എന്നാല്‍, ദാദ്രി സംഭവത്തിന് നാളുകള്‍ക്ക് ശേഷം മാത്രം പ്രതികരിച്ച പ്രധാനമന്ത്രി ക്രൂരമായ കൊലപാതകത്തെ അപലപിക്കാതിരുന്നത് തികച്ചും ദുരൂഹമാണ്.

അതിനു കൃത്യമായ ഉറപ്പുകള്‍ നല്‍കാതെ ചില കാര്യങ്ങള്‍ മാത്രം സൂചിപ്പിക്കുകയാണ് പ്രധാനമന്ത്രി ചെയ്തത്.ഇതു വര്‍ഗീയ വാദികളെ സഹായിക്കുന്ന നിലപാട് തന്നെയാണ്. ഇനിയെങ്കിലും എല്ലാ വിഭാഗക്കാരുടെയും സുരക്ഷ ഉറപ്പാക്കാന്‍ പ്രധാനമന്ത്രി നടപടി സ്വീകരിക്കണമെന്നും സുധീരന്‍ പറഞ്ഞു. തിരുവനന്തപുരത്ത് മാധ്യമപ്രവര്‍ത്തകരുടെ ചോദ്യങ്ങളോട് പ്രതികരിക്കുകയായിരുന്നു അദ്ദേഹം.