കാട്ടാന ആക്രമണം: ആദിവാസി യുവാവ് മരിച്ചു

പുല്‍പള്ളി: കാട്ടാന ആക്രമണത്തില്‍ വനം വകുപ്പിലെ താല്‍കാലിക വാച്ചര്‍ മരിച്ചു. വേലിയമ്പം ചുള്ളിക്കാട് കാട്ടുനായ്ക്ക കോളനിയിലെ ചന്ദ്രന്‍ (45) ആണ് മരിച്ചത്. ശനിയാഴ്ച രാത്രി എട്ടു മണിയോടെയാണ് സംഭവം. ജോലികഴിഞ്ഞ് സഹോദരന്‍ ബാബുവിനൊപ്പം കോളനിയിലെ വീട്ടിലേക്ക് നടന്നുവരവെയാണ് ആന ആക്രമിച്ചത്. കോളനിക്കാര്‍ ബഹളം കേട്ട് ഓടിവരികയായിരുന്നു.
പിന്നീട് വനപാലകര്‍ പുല്‍പള്ളി ഗവ. ആശുപത്രിയിലും മാനന്തവാടി ജില്ലാ ആശുപത്രിയിലും പ്രവേശിപ്പിച്ചു. തുടര്‍ന്ന് കോഴിക്കോട് മെഡിക്കല്‍ കോളജ് ആശുപത്രിയിലേക്കു കൊണ്ടുപോകുംവഴി മരിക്കുകയായിരുന്നു.  ഭാര്യ: ശാന്ത. മക്കള്‍: ബാബു, മിനി, ജിത്തു, അമ്മു, ഉണ്ണികൃഷ്ണന്‍, അഭിലാഷ്, ശ്രീജിത്ത്.കുടുംബത്തിന് നഷ്ടപരിഹാരം ആവശ്യപ്പെട്ട് പ്രദേശവാസികള്‍ നെയ്ക്കുപ്പയില്‍ റോഡ് ഉപരോധിച്ചു.