സ്കൗട്ട് ക്യാമ്പ് കഴിഞ്ഞ് മടങ്ങിയ അധ്യാപിക ബസിടിച്ച് മരിച്ചു

അധ്യാപികമാരും വിദ്യാര്‍ഥികളുമടങ്ങുന്ന സംഘം സഞ്ചരിച്ച മിനി ബസ് ഡ്രൈവര്‍ക്ക് ഉറക്കം വന്നതിനാല്‍ റോഡരികില്‍ ഒതുക്കിയിട്ടിരുന്നു. ഈസമയം ഇവര്‍ പുറത്തിറങ്ങി. പുറപ്പെടാന്‍ നേരം റസീനയും മറ്റ് രണ്ട് അധ്യാപികമാരും വാഹനത്തിനടുത്തേക്ക് റോഡുമുറിച്ച് കടക്കുന്നതിനിടെ ഗുരുവായൂരില്‍നിന്ന് എറണാകുളത്തേക്ക് പോവുകയായിരുന്ന സ്വകാര്യ ലിമിറ്റഡ് സ്റ്റോപ് ബസ് റസീനയെ ഇടിച്ച് തെറിപ്പിക്കുകയായിരുന്നു. മറ്റ് രണ്ടുപേര്‍ക്കും പരിക്കില്ല. നിയന്ത്രണം വിട്ട ബസ് സമീപത്തെ വൈദ്യുതി തൂണും ബോര്‍ഡുകളും മതിലും ഇടിച്ച് തകര്‍ത്താണ് നിന്നത്.

പരിക്കേറ്റ അധ്യാപികയെ  കൊടുങ്ങല്ലൂര്‍ മോഡേണ്‍ ആശുപത്രിയില്‍ എത്തിച്ചെങ്കിലും മരിച്ചു. മൃതദേഹം 1.30ഓടെ നാട്ടിലേക്ക് കൊണ്ടുപോയി. ഫറോക്ക് ഹയര്‍ സെക്കന്‍ഡറി സ്കൂളിന് പുറമെ കോഴിക്കോട് ചാലപ്പുറം ഗണപത് ജി.ജി.എം.ജി.എച്ച്.എസ്, വെനര്‍ണി ഇ.എം.എച്ച്.എസ്.എസ് എന്നീ വിദ്യാലയങ്ങളിലെ വിദ്യാര്‍ഥികളും അധ്യാപകരുമാണ് ബസിലുണ്ടായിരുന്നത്. 19ന് ക്യാമ്പിലത്തെിയ ഇവര്‍ 23ന് വൈകീട്ടാണ് നാട്ടിലേക്ക് മടങ്ങിയത്.