മാഹിയിൽ സി.പി.എം, ബി.ജെ.പി പ്രവർത്തകരുടെ വീടുകൾക്ക് നേരെ ആക്രമണം

മാഹി: മാഹിയിലെ ഈസ്റ്റ് പള്ളൂരിൽ സി.പി.എം, ബി.ജെ.പി പ്രവർത്തകരുടെ വീടുകൾക്ക് നേരെ ആക്രമണം. ബുധനാഴ്ച രാത്രി ഒമ്പതരയോടെയായിരുന്നു സംഭവം. സി.പി.എം പ്രവർത്തകൻ പ്രകാശന്‍റെ വീടിന്‍റെ ജനൽ ചില്ലുകൾ അക്രമികൾ തകർത്തു. വീട്ടിനുള്ളിൽ അതിക്രമിച്ചു കയറിയ അക്രമിസംഘം പ്രകാശന്‍റെ സഹോദരിമാരെ തള്ളിമാറ്റി. ഷാജി മോൾ, നിജിഷ എന്നിവർക്ക് നേരെയായിരുന്നു കൈയേറ്റം.

മൂന്ന് മണിക്കൂറിന് ശേഷം 11 മണിയോടെ ബാലഗോകുലം കണ്ണൂർ ജില്ലാ പ്രസിഡന്‍റ് പി.കെ സുരേഷ് ബാബുവിന്‍റെ വീട്ടിന്‍റെ ജനൽ ചില്ലുകൾ തകർക്കപ്പെട്ടു. പ്രദേശത്ത് നടന്ന കല്ലേറിൽ സി.പി.ഐ നേതാവ് ടി. മനോഹര നമ്പ്യാരുടെ വീട്ടു മുറ്റത്ത് നിർത്തിയിട്ടിരുന്ന കാറിന്‍റെ പിൻഭാഗത്തെ ചില്ലും തകർന്നു.