കോഴിക്കോട്ട് വാഹനാപകടം: മൂന്ന് കര്‍ണാടക സ്വദേശികള്‍ മരിച്ചു

കോഴിക്കോട്: ദേശീയ പാതയില്‍ അഴിഞ്ഞിലത്തുണ്ടായ വാഹനാപകടത്തില്‍ മൂന്ന് കര്‍ണാടക സ്വദേശികള്‍ മരിച്ചു. സ്വിഫ്റ്റ് കാറും ട്രാവലറും തമ്മില്‍ കൂട്ടിയിടിച്ചാണ് അപകടമുണ്ടായത്. മഞ്ജുനാഥ്, തിലക്നാഥ്, വിജയ് ചൗരി എന്നിവരാണ് മരിച്ചത്. രണ്ട് പേര്‍ക്ക് പരിക്കേറ്റു. പരിക്കേറ്റവരെ കോഴിക്കോട് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.



പുലര്‍ച്ചെ മൂന്ന് മണിയോടെയാണ് അപകടമുണ്ടായത്. കേരളത്തിലെ വിവിധ ക്ഷേത്രങ്ങള്‍ സന്ദര്‍ശിക്കാന്‍ വന്നവരാണ് കാറിലുണ്ടായിരുന്നത്. ട്രാവലറുമായി ഇടിച്ച സ്വിഫ്റ്റ് പൂര്‍ണമായും തകര്‍ന്നു. കാറിന്‍െറ മുന്‍ ഭാഗത്ത് തീപിടിക്കുകയും ചെയ്തു. നാട്ടുകാരും ഫ്ളയിങ് സ്ക്വാഡും ചേര്‍ന്നാണ് അപകടത്തില്‍പെട്ടവരെ ആശുപത്രിയില്‍ എത്തിച്ചത്. അപകടത്തില്‍പെട്ടവരുടെ ബന്ധുക്കള്‍ കര്‍ണാടകയില്‍ നിന്ന് കേരളത്തിലേക്ക് തിരിച്ചിട്ടുണ്ട്.