മുസ്ലിം ജനസംഖ്യാ വര്‍ധന ഭയാനകമെന്ന് ബി.ജെ.പി. എം.പി

ന്യൂഡല്‍ഹി: ഒരു ദശകത്തിനിടെ മുസ്ലിം ജനസംഖ്യയിലുണ്ടായ വര്‍ധന ഭയാനകമായ സാഹചര്യം സൃഷ്ടിച്ചിരിക്കുകയാണെന്ന് ബി.ജെ.പിയുടെ വിവാദ നേതാവും എം.പിയുമായ യോഗി ആദിത്യനാഥ്. കേന്ദ്ര സര്‍ക്കാര്‍ കഴിഞ്ഞ ദിവസം 2011ലെ സാമുദായിക സെന്‍സസ് കണക്ക് പുറത്തുവിട്ടതിനു പിന്നാലെയാണ്  പ്രസ്താവന. നമ്മള്‍ രണ്ട് നമുക്ക് രണ്ട് എന്ന മുദ്രാവാക്യം കേന്ദ്ര സര്‍ക്കാര്‍ നടപ്പാക്കണമെന്നും ആദിത്യനാഥ്  ആവശ്യപ്പെട്ടു. മുസ്ലിം ജനസംഖ്യ ഇതേതോതില്‍ വര്‍ധിക്കുകയാണെങ്കില്‍ രാജ്യത്ത് സാമുദായിക അസമത്വം ഉണ്ടാകുമെന്നും 50 വര്‍ഷം കഴിഞ്ഞാല്‍ രാജ്യം വിഭജിക്കപ്പെടുമെന്നും അദ്ദേഹം ചൂണ്ടിക്കാട്ടി. എന്നാല്‍,  മുസ്ലിം ജനസംഖ്യാ വളര്‍ച്ച 2001ല്‍ 29.52 ശതമാനമായിരുന്നത് പത്തു വര്‍ഷത്തിന് ശേഷം 24.60 ശതമാനമായി കുറയുകയായിരുന്നു.