വാര്‍ഡ് വിഭജനം: ലീഗിനെ കുറ്റപ്പെടുത്തുന്നത് ശരിയല്ല -ചെന്നിത്തല

കോഴിക്കോട്: തദ്ദേശ ഭരണ തെരഞ്ഞെടുപ്പിന് മുന്നോടിയായി നടന്ന വാര്‍ഡ് വിഭജനത്തില്‍ മുസ്ലിം ലീഗിന് പ്രത്യേക താല്‍പര്യമുണ്ടെന്ന പ്രചാരണം ശരിയല്ളെന്ന് ആഭ്യന്തരമന്ത്രി രമേശ് ചെന്നിത്തല. യു.ഡി.എഫ് കൂട്ടായെടുത്ത തീരുമാനത്തിന്‍െറ പേരില്‍ ലീഗിനെ മാത്രം കുറ്റപ്പെടുത്തുന്നതില്‍ അര്‍ഥമില്ല. കോഴിക്കോട്ട് മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം.

വാര്‍ഡ് വിഭജനകാര്യത്തില്‍ ലീഗ് അമിതാവേശം കാട്ടിയിട്ടില്ല. തെരഞ്ഞെടുപ്പ് രണ്ടു ഘട്ടമായി നടത്താന്‍ സര്‍ക്കാര്‍ ഇതുവരെ തീരുമാനിച്ചിട്ടില്ല. സമയബന്ധിതമായി തെരഞ്ഞെടുപ്പ് നടത്തണമെന്നാണ് യു.ഡി.എഫിന്‍െറ താല്‍പര്യം. തിങ്കളാഴ്ച തെരഞ്ഞെടുപ്പ് കമീഷനുമായി മന്ത്രിമാര്‍ ചര്‍ച്ച നടത്തിയ ശേഷം കാര്യങ്ങള്‍ തീരുമാനിക്കുമെന്നും അദ്ദേഹം അറിയിച്ചു. ഭൂമി തട്ടിപ്പു കേസിലെ അന്വേഷണ ഉദ്യോഗസ്ഥനെ സ്ഥലംമാറ്റിയതിനെക്കുറിച്ചുള്ള ചോദ്യത്തിന് ഇക്കാര്യം പരിശോധിക്കുമെന്ന് രമേശ് ചെന്നിത്തല മറുപടി പറഞ്ഞു.