ചോദ്യപേപ്പര്‍ മാറി; ഐ.എസ്.ആര്‍.ഒ പരീക്ഷ റദ്ദാക്കി

തിരുവനന്തപുരം: ചോദ്യപേപ്പര്‍ മാറിയതിനെ തുടര്‍ന്ന് ഐ.എസ്.ആര്‍.ഒ പരീക്ഷക്കെത്തിയ ഉദ്യോഗാര്‍ഥികള്‍ ബുദ്ധിമുട്ടി. ഐ.എസ്.ആര്‍.ഒ ടെക്നിഷ്യന്‍  ബി ഫിറ്റര്‍ പരീക്ഷക്കെത്തിയവര്‍ക്കാണ് ചോദ്യപേപ്പര്‍ മാറി നല്‍കിയത്. ഇതിനെ തുടര്‍ന്ന് ഇന്നത്തെ പരീക്ഷ റദ്ദാക്കി.

ഇലക്ട്രിഷന്‍ ട്രേഡിന്‍െറ ചോദ്യപേപ്പറാണ് തങ്ങള്‍ക്ക് ലഭിച്ചതെന്ന് ഉദ്യോഗാര്‍ഥികള്‍ പറഞ്ഞു. തിരുവനന്തപുരം പട്ടം സെന്‍റ് മേരീസ് സ്കൂളാണ് പരീക്ഷാ കേന്ദ്രം. റദ്ദാക്കിയ പരീക്ഷ ഒരു മാസത്തിനുള്ളില്‍ നടത്തുമെന്നാണ് പരീക്ഷയുടെ ചുമതലയുള്ളവര്‍ അറിയിച്ചിരിക്കുന്നത്. എന്നാല്‍ പരീക്ഷ എന്ന് നടത്തുമെന്ന് കൃത്യമായ ഉറപ്പുലഭിച്ചിട്ടില്ല.

2432 പേര്‍ രജിസ്റ്റര്‍ ചെയ്ത പരീക്ഷയാണ് ഇന്ന് നടന്നത്. സംസ്ഥാനത്തിന്‍െറ എല്ലാ ഭാഗത്തുനിന്നും ഇതര സംസ്ഥാനങ്ങളില്‍ നിന്നുമുള്ള ഉദ്യോഗാര്‍ഥികള്‍ പരീക്ഷക്കെത്തിയിരുന്നു.