വിഴിഞ്ഞം: പുനരധിവാസം സംബന്ധിച്ച് മുഖ്യമന്ത്രി ഉത്തരവിറക്കും

തിരുവനന്തപുരം: വിഴിഞ്ഞത്തെ മത്സ്യത്തൊഴിലാളികളുടെ പുനരധിവാസം സംബന്ധിച്ച് പ്രത്യേക ഉത്തരവ് പുറപ്പെടുവിക്കുമെന്ന് മുഖ്യമന്ത്രി ഉറപ്പു നല്‍കിയതായി ലത്തീന്‍ കത്തോലിക്കാസഭാ നേതൃത്വം. തുറമുഖ പദ്ധതി സംബന്ധിച്ച് മുഖ്യമന്ത്രിയുമായി നടത്തിയ ചര്‍ച്ച ആശാവഹമായിരുന്നു. മത്സ്യത്തൊഴിലാളികളുടെ ആശങ്ക വസ്തുനിഷ്ഠമെന്ന് മുഖ്യമന്ത്രി അംഗീകരിച്ചു. തിങ്കളാഴ്ച അദാനിയുമായി കരാര്‍ ഒപ്പിടുന്നതിന് മുമ്പ് സര്‍ക്കാരുമായി വീണ്ടും ചര്‍ച്ച നടത്തും. സമരം തുടരണമോ എന്ന കാര്യം വൈകിട്ട് തീരുമാനിക്കുമെന്നും പ്രതിനിധികള്‍ മാധ്യമപ്രവര്‍ത്തകരോട് പറഞ്ഞു.

രാവിലെ ക്ളിഫ് ഹൗസില്‍വെച്ചാണു മുഖ്യമന്ത്രി ഉമ്മന്‍ചാണ്ടിയുമായി  അതിരൂപത പ്രതിനിധികള്‍ ചര്‍ച്ച നടത്തിയത്. വെള്ളിയാഴ്ച പദ്ധതിയുമായി ബന്ധപ്പെട്ട് ചീഫ് സെക്രട്ടറി ജിജി തോംസണ്‍ തിരുവനന്തപുരം ലത്തീന്‍ അതിരൂപത ആര്‍ച്ച് ബിഷപ് ഡോ. സൂസപാക്യത്തെ സന്ദര്‍ശിച്ചു ചര്‍ച്ച നടത്തിയിരുന്നു.