ചര്‍ച്ച നടന്നില്ല; പി.എസ്.സിയിലെ പ്രതിസന്ധി തുടരുന്നു

തിരുവനന്തപുരം: ധനവകുപ്പും പി.എസ്.സിയുടെ സാമ്പത്തിക ഉപസമിതി അംഗങ്ങളും തമ്മില്‍ വ്യാഴാഴ്ച ചര്‍ച്ച നടന്നില്ല. ധനവകുപ്പ് ഏര്‍പ്പെടുത്തിയ സാമ്പത്തിക നിയന്ത്രണം നീക്കിയതുമില്ല. ഇതോടെ പി.എസ്.സിയുടെ ഇടപാടുകള്‍ക്ക് ഏര്‍പ്പെടുത്തിയ നിയന്ത്രണം ഒരാഴ്ച പിന്നിട്ടു. പ്രശ്നം ചര്‍ച്ച ചെയ്ത് പരിഹരിക്കാന്‍ ധനമന്ത്രി കെ.എം. മാണിയെ മന്ത്രിസഭാ യോഗം ചുമതലപ്പെടുത്തിയിരുന്നു.
എന്നാല്‍ ചര്‍ച്ച സംബന്ധിച്ച അറിയിപ്പ് ഇന്നലെ പി.എസ്.സിക്ക് ലഭിച്ചില്ല. ഇന്നലെ  മാണി തലസ്ഥാനത്തുണ്ടായിരുന്നു. എന്നാല്‍ ചര്‍ച്ചയുടെ കാര്യത്തില്‍ ധാരണ വന്നില്ല.
മന്ത്രിസഭാ തീരുമാനത്തിന്‍െറ അടിസ്ഥാനത്തില്‍ നിര്‍ദേശങ്ങളൊന്നും ധനവകുപ്പില്‍ ലഭിച്ചിട്ടുമില്ല. സാമ്പത്തിക നിയന്ത്രണം ഏര്‍പ്പെടുത്തിയ നിലപാടില്‍ ധനവകുപ്പ് ഉറച്ചുനില്‍ക്കുകയാണ്.
എന്നാല്‍ ധനകാര്യ പരിശോധനാ വിഭാഗത്തിന്‍െറ അന്വേഷണം അനുവദിക്കില്ളെന്നും നിയന്ത്രണം നീക്കണമെന്നുമാണ് കമീഷന്‍െറ നിലപാട്. മുഖ്യമന്ത്രിയെക്കണ്ട് കമീഷന്‍ ചെയര്‍മാനും അംഗങ്ങളും ഈ ആവശ്യം ഉന്നയിച്ചിരുന്നു.