ലൈസൻസില്ലാതെ 20 വർഷമായി ഓ​ട്ടോ ഒാടിച്ച ബി.ജെ.പി നേതാവ്​ പിടിയിൽ

കരുനാഗപ്പള്ളി: 20 വർഷത്തോളമായി കരുനാഗപ്പള്ളിയിൽ ലൈസൻസില്ലാതെ ഓ​ട്ടോ ഓടിച്ച ബി.ജെ.പി നേതാവ്​ ഒടുവിൽ കുടുങ്ങി. ‘താമരയണ്ണൻ’ എന്നറിയപ്പെടുന്ന ശൂരനാട് കരോട്ടയ്യത്ത് യശോധരനാണ്​ കരുനാഗപ്പള്ളിയിൽ പട്രോളിങ്​ നടത്തുകയായിരുന്ന പൊലീസ്​ സംഘത്തി​​​െൻറ പിടിയിലായത്​.

ഓട്ടോറിക്ഷയിൽ താമരയും ബി. ജെ. പി നേതാക്കളുടെ ചിത്രവുമാണ്​. ഓട്ടോയുടെ പേര് താമരയണ്ണൻ. പ്രധാനമന്ത്രി നരേന്ദ്ര മോദിയുടെ ചിത്രം പതിപ്പിച്ച ഈ ഓട്ടോറിക്ഷയും ഡ്രൈവർ യശോധരനും പ്രശസ്തനാണ്. ബി.ജെ.പിയുടെ ഏത് പരിപാടി സംസ്ഥാനത്ത് എവിടെ ഉണ്ടെങ്കിലും ബി. ജെ.പി നേതാക്കളുടെ ചിത്രങ്ങൾ വെച്ച് അലങ്കരിച്ച വാഹനം അവിടെയെത്തും. കടുത്ത സംഘ പ്രവർത്തകനും ബി. ജെ. പി നേതാവുമാണ്​ യശോധരൻ. 

20 വർഷത്തോളമായി ഓട്ടോറിക്ഷ ഓടിക്കുന്ന ഇയാൾ ലൈസൻസ് ഇല്ലാതെയാണ് ഇത്രയും നാൾ വാഹനം ഓടിച്ചിരുന്നത്​. കഴിഞ്ഞ ദിവസം കരുനാഗപ്പള്ളി ഹൈസ്കൂൾ ജങ്​ഷനിൽ വെച്ച് മാസ്കും യൂണിഫോമും ധരിക്കാതെ ഓട്ടോയിലെത്തിയ ഇയാളെ പട്രോളിങ്​ സംഘം തടഞ്ഞു. തുടർന്നുള്ള പരിശോധനയിൽ ഇയാൾക്ക് ലൈസൻസ് ഇല്ലെന്ന് കണ്ടെത്തുകയായിരുന്നു. പൊലീസ് കൺട്രോൾ റൂം എസ്.ഐ പ്രസന്ന​​​െൻറ നേതൃത്വത്തിലുള്ള സംഘമാണ് ഇയാളെ പിടികൂടിയത്. തൊടിയൂർ പാലത്തിനു സമീപമുള്ള സ്റ്റാൻഡിലാണ് ഇയാൾ ഓട്ടോ ഓടിച്ചിരുന്നത്. 

കടുത്ത മോദി ഭക്തൻ കൂടിയായ ഇയാൾ ത​​​െൻറ ഓട്ടോക്ക്​ ‘മോഡിജി’ എന്നുകൂടി പേരു നൽകിയിരുന്നു. ഇയാൾ പിടിയിലായതോടെ രക്ഷിക്കാൻ ഉന്നതരിൽ ചിലർ രംഗത്തെത്തിയെങ്കിലും പൊലീസ് വഴങ്ങിയില്ല. വിവിധ വകുപ്പുകൾ പ്രകാരം കേസെടുത്തതായി കരുനാഗപ്പള്ളി സി.ഐ എസ് മഞ്ജുലാൽ അറിയിച്ചു.