14 കാരിയെ പീഡിപ്പിച്ച കേസിൽ മാതാവും പിതൃസഹോദരനും അറസ്​റ്റിൽ

പുനലൂർ: സംസ്​ഥാന അതിർത്തിയിലെ തമിഴ്നാട് പുളിയറയിൽ മലയാളിയായ 14 കാരിയെ പീഡിപ്പിച്ച സംഭവവുമായി ബന്ധപ്പെട്ട്​ പെൺകുട്ടിയുടെ മാതാവിനെയും പിതൃസഹോദരനായ 20 കാരനെയും തെന്മല പൊലീസ് അറസ്​റ്റ്​ ചെയ്തു. പെൺകുട്ടിയുടെ പിതാവും പത്തനംതിട്ട, പുളിയറ സ്വദേശിയായ രണ്ടുപേരും ഒളിവിലാണ്​. ഇവർക്കായി അന്വേഷണം ഉൗർജിതമാക്കി. 

പ്രതികൾ താമസിച്ച് ജോലി ചെയ്തിരുന്ന പുളിയറയിലെ ഫാമിലും പെൺകുട്ടിയെ പീഡനത്തിന് വിധേയമാക്കിയ സ്ഥലങ്ങളിലും അറസ്​റ്റിലായവരെ ബുധനാഴ്ച എത്തിച്ച്​ തെളിവെടുത്തു. പുളിയറയിലെ ഫാമിന്​ പുറമേ മറ്റ്ചിലയിടങ്ങളിലും കൊണ്ടുപോയി പെൺകുട്ടിയെ പീഡിപ്പിച്ചതായും മാതാപിതാക്കളുടെ ഒത്താശയോടെയാണ് പീഡനം നടന്നതെന്നും പൊലീസ് പറഞ്ഞു. തിരുവനന്തപുരം ആനപ്പാറയിലെ പെൺകുട്ടിയുടെ കുടുംബം ഒന്നര വർഷംമുമ്പാണ് ജോലിക്കായി ആര്യങ്കാവിലെത്തിയത്. ഇവർക്കൊപ്പം പിതൃസഹോദരനുമുണ്ടായിരുന്നു. ഇവിടെ തൊഴിൽ നഷ്​ടപ്പെട്ടതോടെ അടൂർ സ്വദേശിയുടെ പുളിയറയിലെ ഫാമിലെത്തുകയായിരുന്നു. അടുത്തിടെ പെൺകുട്ടിയെ തട്ടിക്കൊണ്ടുപോയതായി ആരോപിച്ച് മാതാവ് തെന്മല പൊലീസിൽ പരാതി നൽകി.

എന്നാൽ, രണ്ടു ദിവസം കഴിഞ്ഞപ്പോൾ പെൺകുട്ടി വീട്ടിൽ തിരിച്ചെത്തിയതായി മാതാവ് പൊലീസിനെ അറിയിച്ചു. സംശയം തോന്നിയ പൊലീസ് മാതാവിനെയും പെൺകുട്ടിയെയും സ്​റ്റേഷനിലെത്തിച്ചു. പെൺകുട്ടിയെ കൂടുതൽ ചോദ്യം ചെയ്തപ്പോഴാണ് പീഡനവിവരം അറിയുന്നത്. പിന്നീട് പെൺകുട്ടിയെ വൈദ്യ പരിശോധനക്ക് വിധേയമാക്കി. തുടർന്ന്, മാതാവിനെയും പിതൃസഹോദരനെയും അറസ്​റ്റ്​ ചെയ്യുകയായിരുന്നു. പ്രതികളെ ബുധനാഴ്ച വൈകീട്ട് പുനലൂർ കോടതിയിൽ ഹാജരാക്കി റിമാൻഡ്​ ചെയ്തു.