ലോക്​ഡൗൺ ലംഘിച്ച്​ പള്ളിയിൽ തറാവീഹ്​ നമസ്​കാരം; 13 പേർ അറസ്​റ്റിൽ

കുന്നംകുളം (തൃശൂർ): ലോക്​ഡൗണ്‍ നിയന്ത്രണം ലംഘിച്ച് വിശ്വാസികളെ പങ്കെടുപ്പിച്ച് തറാവീഹ് നമസ്‌കാരം നടത്തിയ സംഭവത്തിൽ കേച്ചേരി ആയമുക്ക് മസ്​ജിദ് ഖത്തീബ് ഉൾപ്പെടെ  13 പേർ അറസ്​റ്റിൽ. ഖതീബ് അഷ്​കർ അലി ബാദരി (42 ) ഉൾപ്പെടെയുള്ളവരെയാണ് കുന്നംകുളം സ്​റ്റേഷൻ ഹൗസ് ഓഫിസർ കെ.ജി. സുരേഷ്, എസ്​.ഐ ഇ. ബാബു എന്നിവരുടെ നേതൃത്വത്തിലെ  പൊലീസ് അറസ്​റ്റ്​ ചെയ്​തത്. 

ആയമുക്ക് സ്വദേശികളായ മുഹമ്മദ് കോയ (59), ഷറഫുദ്ദീൻ (48), യൂനുസ് (24), സുലൈമാൻ (59), സുബൈർ (39), അഷ്‌കർ (42), അബ്​ദുസ്സലാം (28), നൗഷാദ് (45), ഷൗക്കത്തലി (45), ഫസലുദ്ദീൻ (47) സുധീർ (46), സൽമാൻ (18), അബ്​ദുല്ലത്തീഫ് എന്നിവരാണ് അറസ്​റ്റിലായ മറ്റുള്ളവർ. ഇവരെ പിന്നീട് ജാമ്യത്തില്‍ വിട്ടയച്ചു. 

ബുധനാഴ്​ച രാത്രിയായിരുന്നു സംഭവം. ലോക്​ഡൗണ്‍ നിയന്ത്രണം ഉള്ളതിനാല്‍ പള്ളി അടച്ചിട്ടിരിക്കുകയാണ്. പിന്‍വാതിലിലൂടെയാണ്​ ഇവർ പള്ളിയിലെത്തിയത്​. ഇതിൽ കുട്ടികളുമുണ്ടായിരുന്നു. നമസ്‌കാരം ആരംഭിച്ച് അല്‍പ്പസമയത്തിനകം തന്നെ രഹസ്യവിവരത്തെ തുടര്‍ന്ന് പൊലീസെത്തി. ഇതോടെ ചിലര്‍ ഓടിരക്ഷപ്പെട്ടു. 

സംഭവസ്ഥലത്ത് നമസ്‌കരിക്കാന്‍ 15 ലേറെ പേരുണ്ടായിരുന്നതായാണ് വിവരം. ലോക്​ഡൗണ്‍ നിയന്ത്രണത്തിൻെറ ഭാഗമായി പള്ളികളില്‍ കൂട്ടപ്രാര്‍ത്ഥന നിരോധിച്ചിരിക്കുകയാണ്.