ഭീകരവാദികളാവുന്നത്​ ഫാഷനായി മാറിയെന്ന്​ ബംഗ്ലാദേശ്​ മന്ത്രി

ധാക്ക: ഭീകരവാദികളാവുന്നത്​ ഫാഷനായി മാറിയെന്ന്​ ബംഗ്ലാദേശ്​ ആഭ്യന്തര മന്ത്രി അസദുസ്സമാൻ ഖാൻ. ധാക്ക ആക്രമണത്തിൽ കൊല്ലപ്പെട്ട തീവ്രവാദികളെല്ലാം ബംഗ്ലാദേശികളും സമ്പന്ന കുടുംബത്തിൽ നിന്നുള്ളവരാണെന്നും​ ഇവർ ഉന്നത വിദ്യാഭ്യാസം നേടിയവരാണെന്നും ഖാൻ  മാധ്യമങ്ങളോട്​ പറഞ്ഞു. അതേസമയം ​പ്രഥമികാന്വേഷണത്തിൽ ജംഇയ്യതുൽ മുജാഹിദീൻ ബംഗ്ലാദേശ്​ തന്നെയാണ്​ (ജെ.എം.ബി) ഭീകരാക്രമണത്തിന്​ പിന്നിലെന്നും മറ്റ്​ ​അന്താരാഷ്​ട്ര ബന്ധങ്ങളുണ്ടോയേന്ന്​​ അന്വേഷിക്കുകയാണെന്നും മുതിർന്ന പൊലീസ്​ ഉദ്യോഗസ്​ഥർ അറിയിച്ചു.

നേരത്തെ അക്രമണത്തിന്​ പിന്നിൽ ​െഎ.എസ്​ ആണെന്ന്​ റിപ്പോർട്ടുണ്ടായിരുന്നെങ്കിലും ആഭ്യന്തര മന്ത്രി ഇത്​ തള്ളിയിരുന്നു. പത്തു വർഷത്തിലധികമായി ബംഗ്ലാദേശിൽ നിരോധിച്ചിരിക്കുന്ന (ജെ.എം.ബി)  ആണ് സംഭവത്തിന്​ പിന്നിലെന്നാണ്​ അദ്ദേഹം അറിയിച്ചത്​. വെള്ളിയാഴ്​ച രാത്രി ബംഗ്ലാദേശ്​ തലസ്ഥാന നഗരിയിലെ നയതന്ത്രമേഖലയായ ഗുല്‍ഷന്‍ രണ്ടിലെ റസ്റ്റോറൻറിലുണ്ടായ ഭീകരാക്രമണത്തിൽ ഇന്ത്യക്കാരിയടക്കം 20 പേരാണ്​ കൊല്ലപ്പെട്ടത്​.