മുസ്‍ലിം അവതാരകനെ കാണാതിരിക്കാന്‍ കണ്ണുപൊത്തി 'ഹം ഹിന്ദു' നേതാവ്

ന്യൂഡൽഹി: ചാനല്‍ ചര്‍ച്ചക്കിടെ മുസ്‍ലിം അവതാരകനെ കാണാതിരിക്കാന്‍ 'ഹം ഹിന്ദു' നേതാവിൻെറ കണ്ണുപൊത്തൽ. സൊമാറ്റോ വിഷയവുമായി ബന്ധപ്പെട്ട്​ ‘ന്യൂസ് 24’ എന്ന ഹിന്ദി ചാനലിൽ ചർച്ചക്കിടെ​ 'ഹം ഹിന്ദു' നേതാവ് അജയ് ഗൗതമാണ്​ തൻെറ​ ഇരു കൈകൾകൊണ്ടും കണ്ണുപൊത്തിയത്​.

സൊമാറ്റോയുടെ അഹിന്ദുവായ ഡെലിവറി ബോയി കൊണ്ടുവന്ന ഭക്ഷണം സ്വീകരിക്കാതെ തിരിച്ചയച്ച അമിത് ശുക്ലയെന്ന യുവാവിൻെറ വാര്‍ത്ത പുറത്തുവന്നതിന് പിന്നാലെയാണ്​ പുതിയ വിവാദം. അവതാരകനായ സന്ദീപ് ചൗധരി നയിച്ച ചര്‍ച്ച മറ്റൊരവതാരകനായ സഊദ് മുഹമ്മദ് ഖാലിദിന് കൈമാറുന്നതിനിടെയാണ് സംഭവം. ഇത്​ വ്യാപക വിമര്‍ശനത്തിന് ഇടയാക്കിയിട്ടുണ്ട്. ട്വിറ്ററിൽ നിരവധി പേർ അജയ്​ ഗൗതമിനെതിരെ രംഗത്തു വന്നു.

അജയ് ഗൗതമിനെ മറ്റു ചര്‍ച്ചകള്‍ക്കായി ഇനി വിളിക്കേണ്ടതില്ലെന്ന്​​ ചാനൽ തീരുമാനിച്ചെന്നാണ്​ റിപ്പോര്‍ട്ട്. സമ്പൂര്‍ണ ഹിന്ദു രാഷ്ട്രം മുദ്രാവാക്യമാക്കിയ സംഘടനയാണ് 'ഹം ഹിന്ദു' എന്ന് ഇവരുടെ വെബ്‍സൈറ്റില്‍ അവകാശപ്പെടുന്നുണ്ട്.