ഇന്ത്യക്കാരിയെ വിവാഹം ചെയ്​ത ന്യൂസിലൻഡ്​ യൂട്യൂബർക്ക്​ വിസ​ വിലക്ക്; കാരണം ഇതാണ്​

ന്യൂഡൽഹി: ന്യൂസിലൻഡ്​ യൂട്യൂബർ കാൾ റോക്കിന്​ കഴിഞ്ഞ വർഷം ഒക്​ടോബർ മുതൽ ഇന്ത്യയിലേക്ക്​ പ്രവേശനം വിലക്കിയതിന്​ വിശദീകരണവുമായി കേന്ദ്ര ആഭ്യന്തര മന്ത്രാലയം. ഇന്ത്യക്കാരിയെ വിവാഹം ചെയ്​ത റോക്കിനെ വിസ നിബന്ധനകൾ ലംഘിച്ചുവെന്ന്​ കാണിച്ചാണ്​ ഇന്ത്യ കരിമ്പട്ടികയിൽ പെടുത്തിയതെന്ന്​ സർക്കാർ അറിയിച്ചു.

യാത്ര സുരക്ഷ, വിനോദ സഞ്ചാര കേന്ദ്രങ്ങൾ, തട്ടിപ്പുകൾ എങ്ങനെ ഒഴിവാക്കാം എന്നിങ്ങനെയുള്ള വിഷയങ്ങളിൽ ഹിന്ദിയിലും ഇംഗ്ലീഷിലുമായാണ്​ റോക്ക്​ വിഡിയോസ്​ നിർമിക്കുന്നത്​. നിലവിൽ റോക്കിന്‍റെ ചാനലിന്​ 18 ലക്ഷം സബ്​സ്​​ക്രൈബേഴ്​സ്​ ഉണ്ട്​. ഡൽഹി സ്വദേശിയായ മനീഷ മാലിക്കിനെയാണ്​ 2019 ഏപ്രലിൽ ഇദ്ദേഹം വിവാഹം ചെയ്​തത്​.

'ദുബൈയിലും പാകിസ്​താനിലും പോകാനായി ഞാൻ 2020 ഒക്ടോബറിൽ ഇന്ത്യ വിട്ടു. ന്യൂഡൽഹി വിമാനത്താവളം വഴി പോയപ്പോൾ അവർ എന്‍റെ വിസ റദ്ദാക്കി. എന്തുകൊണ്ടാണ് എന്‍റെ വിസ റദ്ദാക്കുന്നതെന്ന് അവർ എന്നോട് പറഞ്ഞില്ല. 269 ദിവസമായി ഞാൻ എന്‍റെ ഭാര്യയെ കണ്ടിട്ട്​' - റോക്ക് കഴിഞ്ഞ ദിവസം പങ്കുവെച്ച യൂട്യൂബ് വിഡിയോയിൽ പറഞ്ഞു.

ദുബൈയിലെ ഇന്ത്യൻ ഹൈകമീഷണറാണ്​ കരിമ്പട്ടികയിൽ പെടുത്തിയ വിവരം അദ്ദേഹത്തെ അറിയിച്ചത്​. കാരണം പറയാതെ കരിമ്പട്ടികയിൽ പെടുത്തിയെന്ന്​ ന്യൂസിലൻഡ്​ പ്രധാനമന്ത്രി ജസീന്ത ആർഡോനെ ടാഗ്​ ചെയ്​ത ഒരു ട്വീറ്റിൽ റോക്ക്​ കുറിച്ചു.

അദ്ദേഹം ടൂറിസ്റ്റ വിസയിലെത്തി വ്യാപാരം നടത്തിയെന്നും മറ്റ്​ വിസ നിബന്ധനകൾ ലംഘിച്ചെന്നുമാണ്​ ആഭ്യന്തര മന്ത്രാലയം നൽകിയ വിശദീകരണം. എന്നാൽ 2019ൽ പൗരത്വ ഭേദഗതി നിയമത്തിനെതിരെ റോക്ക്​ ട്വിറ്ററിലൂടെ പ്രതിഷേധിച്ചതിന്‍റെ സ്​ക്രീൻഷോട്ടുകൾ പങ്കുവെച്ച ചില ട്വിറ്ററാറ്റികൾ കാരണമതാണെന്ന്​ ചൂണ്ടിക്കാട്ടി. ഇന്ത്യയുടെ രാഷ്​ട്രീയ വിഷയങ്ങളിൽ ഇടപെട്ടത്​ വിസ റദ്ദാക്കാനുള്ള കാരണങ്ങളിൽ ഒന്നാകാമെന്ന്​ അവർ പറയുന്നു.

രണ്ടുതവണ പ്ലാസ്​മ ദാനം ചെയ്​ത റോക്കിനെ ഡൽഹി മുഖ്യമന്ത്രി അരവിന്ദ കെജ്​രിവാൾ അഭിനന്ദിച്ചിരുന്നു.