ബി.ജെ.പി നേതാവ്​ ഫട്​നാവി​സി​ന്‍റെ മരുമകന്​ മാനദണ്ഡം മറികടന്ന്​ വാക്​സിൻ; പ്രതിഷേധവുമായി പ്രതിപക്ഷം

മുംബൈ: മഹാരാഷ്​ട്രയിൽ ബി.​െജ.പി നേതാവ്​ ദേവേന്ദ്ര ഫട്​നാവിസിന്‍റെ മരുമകൻ ​കോവിഡ്​ വാക്​സിൻ സ്വീകരിച്ചത്​ മാനദണ്ഡങ്ങൾ മറികടന്നാണെന്ന ആരോപണവുമായി പ്രതിപക്ഷം. മരുമകൻ തൻമയ്​ കോവിഡ്​ വാക്​സിൻ സ്വീകരിച്ചതാണ്​ വിവാദമായത്​​.

കോവിഡ്​ വാക്​സിൻ വിതരണത്തിന്‍റെ ആദ്യരണ്ടുഘട്ടങ്ങളിലും മുൻനിരപോരാളികൾക്കും 45 വയസിന്​ മുകളിലുള്ളവർക്കുമാണ്​ കോവിഡ്​ വാക്​സിൻ നൽകിയത്​. എന്നാൽ ഈ മാനദണ്ഡങ്ങളെല്ലാം മറികടന്ന്​ കുടുംബാംഗങ്ങൾക്ക്​ വാക്​സിൻ ആദ്യം നൽകുകയാണെന്ന്​ യൂത്ത്​ കോൺഗ്രസ്​ നേതാവ്​ ശ്രീവത്സ ആരോപിച്ചു.

'പ്രിയ ദേവേന്ദ്ര ഫട്​നാവിസ്,​ നിങ്ങളുടെ മരുമകൻ തൻമയ്​ ഫട്​നാവിന്‍റെ പ്രായം 45 വയസിന്​ മുകളിലാണോ? അല്ലെങ്കിൽ കോവിഡ്​ വാക്​സിൻ സ്വീകരിക്കാൻ അദ്ദേഹം എങ്ങനെ അർഹനായി. റെംഡെസിവിർ പോലെ, നിങ്ങളുടെ കുടുംബത്തിന്​ നൽകാൻ വാക്​സിനും പൂഴ്​ത്തിവെക്കുക​യാണോ​? ജനങ്ങൾ മരിച്ചുവീഴുന്നു. പലയിടങ്ങളിലും വാക്​സിൻ ക്ഷാമം. പക്ഷേ ഫട്​നാവിന്‍റെ കുടുംബം സുരക്ഷിതം' -ശ്രീവത്സ ട്വീറ്റ്​ ചെയ്​തു.

തൻമയ്​ ഫട്​നാവിസ്​ നിയമലംഘനം നടത്തുകയാണെന്നും അദ്ദേഹത്തെ ഉടൻ അറസ്റ്റ്​ ചെയ്യണമെന്നും അദ്ദേഹം കൂട്ടിച്ചേർത്തു. മറ്റുള്ളവർക്ക്​ മാത്യകയായി തൻമയ്​യെ അറസറ്റ്​ ചെയ്യണമെന്ന്​ മഹാരാഷ്​ട്ര മുഖ്യമന്ത്രി ഉദ്ദവ്​ താക്കറെയോട്​ ആവശ്യപ്പെടുകയും ചെയ്​തു.

'മോദിജി, 45 വയസിൽ താഴെയാണെങ്കിൽ പോലും ബി​.ജെ.പി നേതാക്കളുടെ കുടുംബാംഗങ്ങൾക്ക്​ ഏതു നിയമത്തിന്‍റെ കീഴിലാണ്​ വാക്​സിൻ നൽകുന്നതെന്ന്​ പ്രധാനമന്ത്രി നരേന്ദ്രമോദിയോട്​ ശ്രീവത്സ ചോദിച്ചു.

തൻമയ്​ വാക്​സിൻ സ്വീകരിച്ച ചിത്രം സാമൂഹിക മാധ്യമങ്ങളിൽ പങ്കുവെച്ചിരുന്നതായും എന്നാൽ അദ്ദേഹം പിന്നീട്​ ചിത്രം ഒഴിവാക്കിയതായും ശ്രീവാസ്​തവ പറഞ്ഞു.

എന്നാൽ, തൻമയ്​ ഫട്​നാവിസ്​ ഒരു മുൻ​നിര പോരാളിയാണെന്നും അതിനാൽ​ പ്രായപരിധി മാനദണ്ഡമാക്കാതെ വാക്​സിൻ സ്വീകരിക്കാമെന്നുമായിരുന്നു ​സമൂഹമാധ്യമങ്ങളിൽ ചിലർ ഉയർത്തിയ പ്രതികരണം. എന്നാൽ തൻമയ്​ ഒരു നടനാണെന്ന്​ ശ്രീവത്സ മറുപടി നൽകി.

'നടനും 45 വയസിൽ താളെയുമായ തൻമയ്​ ഫട്​നാവിസ്​ വാക്​സിൻ സ്വീകരിച്ചു. ഇത്​ സ്വജനപക്ഷപാതമല്ലേ. തൻമയ്​ ബോളിവുഡ്​ മാഫിയയുടെ ഭാഗമല്ലേ? ഫട്​നാവി​സിനെതിരെ പരാതി പറയാൻ നിങ്ങൾ ഗവർണറെയും മോദിജിയെയും കാണുമോ' - ബോളിവുഡ്​ താരം കങ്കണ റണാവത്തിനെ ടാഗ്​ ചെയ്​ത്​ ശ്രീവത്സ ട്വീറ്റ്​ ചെയ്​തു.