യു.പിയിൽ അറസ്​റ്റിലായവരിൽ പ്രായപൂർത്തിയാകാത്തവരും; സംഘർഷങ്ങളിൽ കുട്ടികൾക്കും പരിക്കേറ്റു

ലഖ്​നോ: യു.പിയിൽ പൗരത്വ നിയമഭേദഗതിക്കെതിരെയുള്ള പ്രതിഷേധത്തിനിടെ പൊലീസ്​ അറസ്​റ്റ്​ ചെയ്​തവരിൽ സ്​കൂൾ വിദ്യാർഥികളും ഉൾപ്പെടുന്നതായി റിപ്പോർട്ടുകൾ. സാംഭലിൽ അറസ്​റ്റിലായ 42 പേരിൽ രണ്ട്​ പേർക്ക്​ 17 വയസുവരെ മാത്രമാണ്​ പ്രായമെന്നാണ്​ റിപ്പോർട്ട്​. യു.പിയിൽ പ്രായപൂർത്തിയാകാത്തവരെ അറസ്​റ്റ്​ ചെയ്​തിട്ടില്ലെന്ന പൊലീസ്​ വാദങ്ങൾക്ക്​ വിരുദ്ധമാണ്​ പുറത്ത്​ വരുന്ന വാർത്തകൾ.

കഴിഞ്ഞ ഒരാഴ്​ചയായി തങ്ങളുടെ കുട്ടികൾ ബറേലിയിലെ ജയിലിലാണെന്ന പരാതിയുമായി സാംഭലിൽ നിന്നുള്ള കുടുംബം രംഗത്തെത്തിയിട്ടുണ്ട്​. പ്രതിഷേധങ്ങൾക്കിടെയുണ്ടായ പൊലീസ്​ നടപടിയിൽ വിദ്യാർഥികൾക്ക്​ പരിക്കേറ്റിട്ടുമുണ്ട്​. പ്രതിഷേധ സമരങ്ങളിൽ പ​ങ്കെടുക്കാത്ത കുട്ടികളെ പോലും യു.പി പൊലീസ്​ തല്ലിയതായി പരാതിയുണ്ട്​. ​

പൗരത്വ നിയമഭേദഗതിക്കെതിരായ പ്രതിഷേധത്തിനിടെ യു.പിയിൽ 8 വയസുകാരൻ കൊല്ലപ്പെട്ടിരുന്നു. അഞ്ചാം ക്ലാസ്​ വിദ്യാർഥിയെ മദ്രസയിൽ നിന്ന്​ മടങ്ങും വഴി പൊലീസ്​ അറസ്​റ്റ്​ ചെയ്യുകയും മർദിക്കുകയും ചെയ്ത സംഭവവും യു.പിയിൽ റിപ്പോർട്ട്​ ചെയ്​തിരുന്നു. പാല്​ വാങ്ങാനായി വീട്ടിൽ നിന്ന്​ പോയ കുട്ടിയെ അടക്കം യു.പി പൊലീസ്​ കസ്​റ്റഡിയിലെടുത്തുവെന്ന ഗുരുതര ആരോപണങ്ങളും ​ ഉയരുന്നുണ്ട്​.