ട്രെക്കിങ് സംഘത്തിലെ യുവ ഡോക്ടർ ഹൃദയാഘാതത്താൽ മരിച്ചു

മംഗളൂരു: ചിക്കമഗളൂരു കലസ കുദ്രെമുഖ് മലയിൽ സാഹസിക സഞ്ചാരത്തിനെത്തിയ സംഘത്തിലെ യുവ ഡോക്ടർ ഹൃദയാഘാതത്തെത്തുടർന്ന് മരിച്ചു. മൈസൂരു ജെ.പി നഗറിലെ ഡോ. കെ. രക്ഷിത് (27) ആണ് മരിച്ചത്.

ഡോക്ടർ ഉൾപ്പെടെ ആറംഗ സംഘമായിരുന്നു ട്രെക്കിങ്ങിന് വന്നത്. പൊടുന്നനെ നെഞ്ചുവേദന അനുഭവപ്പെട്ട് കുഴഞ്ഞു വീഴുകയായിരുന്നു. നാട്ടുകാർ ചേർന്ന് കലസ ആശുപത്രിയിൽ എത്തിച്ചെങ്കിലും മരിച്ചു. ഈയിടെയാണ് രക്ഷിത് എം.ബി.ബി.എസ് പൂർത്തിയാക്കിയത്.