'നിങ്ങൾ കുട്ടികളെ ഉണ്ടാക്കിയിട്ട്​ പഠനച്ചെലവ്​ സർക്കാർ വഹിക്കണമെന്നോ?' സ്​ത്രീകളോട്​ ബി.ജെ.പി എം.​എൽ.എയുടെ ചോദ്യം

ലഖ്​നോ: നിങ്ങൾ ഉണ്ടാക്കിയ കുട്ടികളുടെ പഠനച്ചെലവ്​ എന്തിനാണ്​ സർക്കാർ വഹിക്കണമെന്ന്​ പറയുന്നതെന്ന്​ യു.പിയിലെ ബി.ജെ.​പി എം.എൽ.എ. ഫീസിളവിന്​ ശുപാർശ ചെയ്യണമെന്നാവശ്യപ്പെട്ട്​ തന്നെ വന്നുകണ്ട സ്​ത്രീകളോടാണ്​ എം.എൽ.എയുടെ പ്രതികരണം. ഉത്തർ പ്രദേശിലെ ഒൗരയ്യ മണ്ഡലത്തിലെ രമേശ്​ ദിവാകർ എം.എൽ.എയാണ്​ വിവാദ പരാമർശം നടത്തിയത്​.

ഞായറാഴ്ച നിയോജകമണ്ഡലത്തിൽ നടന്ന പൊതുസമ്മേളനത്തിനിടെയായിരുന്നു സംഭവം. സ്വകാര്യ സ്കൂളുകളിലെ ഫീസ് ഇളവിനായി പ്രദേശവാസികളായ സ്​ത്രീകൾ രമേശ് ദിവാകറെ സമീപിക്കുകയായിരുന്നു. അപ്പോഴാണ്​ 'നിങ്ങൾ കുട്ടികളെ ഉണ്ടാക്കിയിട്ട്​ പൈസ നമ്മൾ കൊടുക്കണോ'' എന്ന്​ ചോദിച്ചത്​. തുടർന്ന്​ തനിക്ക്​ ചുറ്റുമുള്ള സ്​ത്രീകളോടായി 'എന്തിനാണ്​ സർക്കാർ സ്കൂളുകൾ? അവിടെ ഫീസൊന്നും ഈടാക്കുന്നില്ലല്ലോ? നിങ്ങൾക്ക്​ ഭക്ഷണവും വസ്​ത്രവുമെല്ലാം സർക്കാർ നൽകുന്നില്ലേ. നിങ്ങൾ പണത്തിനും ശുപാർക്കുമായി ഞങ്ങളുടെ അടുത്ത്​ വരുന്നു'' -എന്നും എം.എൽ.എ പരിഹസിച്ചു.

എം.എൽഎയുടെ പരിഹാസം അതിരുവിട്ടപ്പോൾ കൂട്ടത്തിലൊരു സ്​ത്രീ 'ഇത്​ നിങ്ങളെ തെരഞ്ഞെടുത്ത പൊതുജനമാണെന്ന്' എം‌.എൽ.‌എയോട് പ്രതികരിച്ചതായും ഇന്ത്യൻ എക്​സ്​പ്രസ്​ റിപ്പോർട്ട്​ ചെയ്​തു.

അതേസമയം, സംഭവത്തെ കുറിച്ച്​ അറിയില്ലെന്ന്​ ബി.ജെ.പി വക്താവ് സമീർ സിങ്​ പറഞ്ഞു. "എനിക്കോ സംസ്ഥാന നേതൃത്വത്തിനോ ഈ വിഷയത്തെക്കുറിച്ച് അറിയില്ല. സ്ത്രീകളോട് നിന്ദ്യമായി സംസാരിക്കാൻ ആർക്കും അവകാശമില്ല. എല്ലാവരെയും ബഹുമാനിക്കുന്ന പാർട്ടിയാണ് ബി.ജെ.പി. എന്തെങ്കിലും പരാതി ഉണ്ടെങ്കിൽ ഇക്കാര്യം അന്വേഷിക്കും'' -അദ്ദേഹം വ്യക്​തമാക്കി.

അതേസമയം, ബി.ജെ.പിയുടെ തനി സ്വരൂപമാണ്​ എം.എൽ.എ കാണിച്ചതെന്ന്​ സമാജ്‌വാദി പാർട്ടി വക്താവ് രാജേന്ദ്ര ചൗധരി അഭിപ്രായപ്പെട്ടു. ബി.ജെ.പിക്കാർ ആരെയും സഹായിക്കാതെ സ്ത്രീകളെ അപമാനിക്കുകയാണ്​ ചെയ്യുന്നത്​. എം‌.എൽ.‌എയുടെ സംസാരം നിർഭാഗ്യകരവും അപലപനീയവുമാണ്​ -അദ്ദേഹം പറഞ്ഞു.