രാജധാനിയിൽ ടിക്കറ്റ്​ ഉറപ്പിക്കാനായില്ലെങ്കിൽ  വിമാനത്തിൽ പറക്കാം

ന്യൂഡൽഹി: രാജധാനി  ട്രെയിനുകളിൽ ടു ടയർ, ത്രീ ടയർ എ.സി കോച്ചുകളിൽ ​ ബുക്ക്​ ചെയ്​ത  ടിക്കറ്റ് ഉറപ്പാക്കാനാകാത്ത ആളുകൾക്ക്​ വിമാനത്തിൽ പറക്കുന്നതിനുള്ള സൗകര്യമൊരുങ്ങുന്നു. നേരത്തെ അശ്വനി ലോഹാനി എയർ ഇന്ത്യയുടെ ചെയർമാനായിരുന്ന സമയത്ത്​ ഇതിനുള്ള പദ്ധതി മുന്നോട്ട്​ വെച്ചിരുന്നു. 

എന്നാൽ റെയിൽവേ ഇതിനോട്​ പ്രതികരിച്ചിരുന്നില്ല. നിലവിൽ അശ്വനി ലോഹാനി റെയിൽവേ ബോർഡ്​  ​തലപ്പത്തുണ്ട്​. പഴയ പദ്ധതിയുമായി എയർ ഇന്ത്യ സഹകരിക്കാൻ തയാറാണെന്ന്​ അറിയിക്കുകയാണെങ്കിൽ റെയിൽവേക്കും അനുകൂല സമീപനമുണ്ടാകുമെന്ന്​ ലോഹാനി പ്രതികരിച്ചു. രാജധാനി ട്രെയിനുകളിൽ സീറ്റ്​​ ബുക്ക്​ ചെയ്​ത്​ ടിക്കറ്റ്​ ഉറപ്പാകാത്തവരുടെ വിവരങ്ങൾ റെയിൽവേ എയർ ഇന്ത്യക്ക്​ കൈമാറും. ഇൗ വിവരങ്ങളുടെ അടിസ്ഥാനത്തിൽ ടിക്കറ്റ്​ ഉറപ്പാകാത്തവർക്ക്​ കുറഞ്ഞ നിരക്കിൽ എയർ ഇന്ത്യ ടിക്കറ്റുകൾ നൽകും.

അതേ സമയം, എയർ ഇന്ത്യ സ്വകാര്യവൽക്കരണത്തിലേക്ക്​ അതിവേഗം മുന്നേറുകയാണ്​. പൂർണമായും സ്വകാര്യ കമ്പനിയായി എയർ ഇന്ത്യ മാറിയാൽ കുറഞ്ഞ നിരക്കിൽ ടിക്കറ്റ്​ വിതരണം ചെയ്യുന്നത്​ സംബന്ധിച്ച്​ ആശങ്കകൾ നില നിൽക്കുന്നുണ്ട്​.