അധികാരത്തിലുള്ളപ്പോഴെല്ലാം കോൺഗ്രസ്​ ഹിന്ദുസംഘടനകളെ ദ്രോഹിച്ചുവെന്ന്​ യോഗി

ഫറൂഖാബാദ്​ (യു.പി): കോൺഗ്രസ്​ അധികാരത്തിലിരുന്നപ്പോഴെല്ലാം ഹിന്ദുസംഘടനകൾക്കെതിരെ കള്ളക്കേസുകളുണ്ടാക്കാനും ഭീകരവാദികളെ വളർത്താനുമാണ്​ ശ്രമിച്ചതെന്ന്​ ഉത്തർപ്രദേശ്​ മുഖ്യമന്ത്രി യോഗി ആദിത്യനാഥ്​ ആരോപിച്ചു. 2008 മാലേഗാവ്​ സ്​ഫോടനക്കേസിൽ ഒരു സാക്ഷികൂടി കൂറുമാറിയതിന്​ പിന്നാലെയാണ്​ യോഗിയുടെ പ്രസംഗം. കേസിൽ യോഗിക്കും അഞ്ച്​ ആർ.എസ്​.എസുകാർക്കുമെതിരെ മൊഴിനൽകാൻ ഭീകരവിരുദ്ധ സ്ക്വാഡ്​ ഓഫിസർമാർ സമ്മർദംചെലുത്തിയെന്നാണ്​ ചൊവ്വാഴ്ച കൂറുമാറിയ ആൾ എൻ.ഐ.എ കോടതിയിൽ പറഞ്ഞത്​. കോൺഗ്രസ്​ നടത്തിയത്​ രാജ്യത്തിനെതിരായ നീക്കമാണെന്ന്​ പറഞ്ഞ യോഗി, ഈ വിഷയത്തിൽ അവരുടെ നേതൃത്വം മാപ്പുപറയണമെന്നും ആവശ്യപ്പെട്ടു. ബി.ജെ.പി പൊതുയോഗത്തിൽ സംസാരിക്കുകയായിരുന്നു യോഗി. യോഗത്തിൽ, എസ്​.പി അധ്യക്ഷൻ അഖിലേഷ്​ യാദവിനെയും മുഖ്യമന്ത്രി വിമർശിച്ചു. കാൺപൂരിലെ സുഗന്ധവ്യാപാരിയുടെ വീട്ടിൽ റെയ്​ഡ്​ നടന്നപ്പോഴാണ്​ എന്തിനാണ്​ അഖിലേഷ്​ നോട്ടുനിരോധനത്തെ എതിർത്തതെന്ന്​ വ്യക്തമായതെന്ന്​ അദ്ദേഹം പരിഹസിച്ചു