'എല്ലാം സംസാരത്തിലൂടെ പരിഹരിക്കാം'; പ്രശ്​നപരിഹാരത്തിന്​ യോഗിയുടെ നിർദേശം

ലഖ്​നൗ: ഉത്തർപ്രദേശിലെ ഹാഥറസിൽ 19 കാരിയായ ദലിത്​ പെൺകുട്ടി കൂട്ടബലാത്സംഗത്തിനിരയായതിന്​ പിന്നാലെ പ്രതിഷേധം കടുത്തതോടെ പൊലീസിന്​ ഉപദേശവുമായി മുഖ്യമന്ത്രി യോഗി ആദിത്യനാഥ്​. സർക്കാരും പൊലീസും വിവിധ കോണുകളിൽ നിന്നും രൂക്ഷമായ വിമർശനങ്ങൾ ഏറ്റുവാങ്ങിയ പശ്ചാത്തലത്തിലാണ്​ യോഗിയുടെ പ്രതികരണം.

''എല്ലാ വലിയ പ്രശ്​നങ്ങളും പരസ്​പരമുള്ള സംസാരത്തിലൂടെ പ്രതികരിക്കാനാകും. ​'പുതിയ ഉത്തർപ്രദേശിൽ' പ്രശ്​ന പരിഹാരത്തിനുള്ള ഏറ്റവും നല്ല മാധ്യമം സംഭാഷണങ്ങളാണ്​. പട്ടിക ജാതി-ഗോത്രവർഗത്തിൽ നിന്നുള്ള അമ്മമാരുടെയും സഹോദരിമാരുടെയും പ്രശ്​നങ്ങൾ പൊലീസ്​ വേഗത്തിലും പ്രത്യേക താൽപര്യത്തിലും പരിഹരിക്കേണ്ടതുണ്ട്​'' -യോഗി ട്വീറ്റ്​ ചെയ്​തു.

ഉത്തർപ്രദേശിൽ കുറ്റകൃത്യങ്ങൾ വർധിച്ചുവരുന്നതും പൊലീസി​െൻറ നിഷ്​ക്രിയത്വവും രാജ്യത്തൊട്ടാകെ ചർച്ചയായി ഉയർന്നിരുന്നു.നാഷനൽ ക്രൈം റെക്കോഡ്സ് ബ്യൂറോ (എൻ.സി.ആർ.ബി) പുറത്തുവിട്ട പുതിയ റിപ്പോർട്ടുകളിൽ 2016നും 19നും ഇടയിൽ ഉത്തർപ്രദേശിൽ സ്ത്രീകൾക്കെതിരായ അതിക്രമങ്ങൾ 20 ശതമാനം വർധിച്ചിരിക്കുന്നതായി കണ്ടെത്തിയിരുന്നു. രാജ്യത്ത് സ്ത്രീകൾ ഏറ്റവും അരക്ഷിതരായ സംസ്ഥാനമാണ് യു.പി. സംസ്​ഥാനത്ത്​ രജിസ്​റ്റർ ചെയ്യപ്പെട്ട 3,946 ബലാത്സംഗ കേസുകളിൽ ഇരകളായ 4322 പേരിൽ 1411 ഉം പ്രായപൂർത്തിയാവാത്ത ബാലികമാരായിരുന്നു. പോക്​സോ നിയമപ്രകാരം 5401 കേസുകളാണ് 2018ൽ രജിസ്​റ്റർ ചെയ്തത്. 2444 കേസുകൾ സ്ത്രീധനപീഡന മരണങ്ങളായിരുന്നു. പട്ടികജാതി വിഭാഗങ്ങൾക്കെതിരായ കുറ്റകൃത്യങ്ങളിലുള്ള 27.9 ശതമാനം വർധനവും എൻ.സി.ആർ.ബി റിപ്പോർട്ടിൽ പരാമർശിച്ചിരുന്നു.