Begin typing your search above and press return to search.
proflie-avatar
Login
exit_to_app
exit_to_app
Homechevron_rightNewschevron_rightIndiachevron_rightവിവാദങ്ങളൊഴിയാതെ...

വിവാദങ്ങളൊഴിയാതെ ഭരണത്തിൽ യെദിയൂരപ്പക്ക്​ രണ്ടാണ്ട്​

text_fields
bookmark_border
Yediyurappa
cancel

ബംഗളൂരു: കർണാടക മുഖ്യമന്ത്രി പദത്തിൽ രണ്ടു വർഷം തികച്ച്​ ബി.എസ്​. യെദിയൂരപ്പ. 2019 ജൂലൈ 26നായിരുന്നു കർണാടകയുടെ 25ാം മുഖ്യമന്ത്രിയായി യെദിയൂരപ്പ അധികാരമേറ്റത്​. തുടക്കം മുതൽ വിവാദങ്ങളുടെ അകമ്പടിയോടെയായിരുന്നു ഭരണം. സഖ്യ സർക്കാറി​െൻറ അട്ടിമറിയിൽ തുടങ്ങി വിമതനേതാക്കളെ ബി.ജെ.പിയിൽ ഉൾപ്പെടുത്തി ഉപതെരഞ്ഞെടുപ്പിൽ സ്​ഥാനാർഥിത്വം നൽകലും മന്ത്രിസ്​ഥാനം നൽകലുമെല്ലാം പാർട്ടിയിൽ ഒറ്റക്കുനിന്നാണ്​ യെദിയൂരപ്പ നേടിയെടുത്തത്​.

ആർക്കും കേവല ഭൂരിപക്ഷം ലഭിക്കാതിരുന്ന 2018ലെ നിയമസഭ തെരഞ്ഞെടുപ്പിൽ കോൺഗ്രസും ജെ.ഡി^എസും തെരഞ്ഞെടുപ്പിന്​ ശേഷം സഖ്യമുണ്ടാക്കി അധികാരത്തിലേറിയതും ഒരു വർഷം തികഞ്ഞപ്പോൾ 17 എം.എൽ.എമാ​െര ഭരണപക്ഷത്തുനിന്ന്​ വരുതിയിലാക്കി യെദിയൂരപ്പയുടെ നേതൃത്വത്തിൽ സർക്കാറിനെ അട്ടിമറിച്ചതും ചരിത്രം. കുതിരക്കച്ചവടത്തി​െൻറയും ഒാപറേഷൻ താമരയുടെയും കരിനിഴലിൽ സത്യപ്രതിജ്​ഞ ചെയ്​ത യെദിയൂരപ്പ കർണാടക രാഷ്​ട്രീയത്തിൽ കുതന്ത്രങ്ങളുടെ ചാണക്യനാണെന്ന്​ തെളിയിച്ച നാളുകളായിരുന്നു അത്​. കോൺഗ്രസിൽ നിന്നും ജെ.ഡി^എസിൽനിന്നും രാജിവെച്ച എം.എൽ.എമാർ ബി.ജെ.പിയുടെ തണലിൽ സുരക്ഷിതമായി മുംബൈയിലെ ഹോട്ടലിൽ കഴിയു​േമ്പാഴായിരുന്നു ബംഗളൂരുവിലെ രാജ്​ഭവനിൽ യെദിയൂരപ്പയുടെ സത്യപ്രതിജ്​ഞ​. എം.എൽ.എമാർക്കായി യെദിയൂരപ്പ വിലപേശുന്ന ശബ്​ദസന്ദേശമടക്കം പുറത്തായിട്ടും അന്വേഷണമൊന്നും എവിടെയുമെത്തിയില്ല.

ഭരണത്തിലിരിക്കെ ബി.ജെ.പിക്കകത്തെ അധികാര വടംവലിയാണ്​ യെദിയൂരപ്പക്ക്​ ഏറെ തലവേദന സൃഷ്​ടിച്ചത്​. ബസനഗൗഡ പാട്ടീൽ യത്​നാൽ അടക്കമുള്ള നേതാക്കൾ നിരന്തരം വിമർശനമുന്നയിച്ചു. മകൻ ബി.വൈ. വിജയേന്ദ്രയുടെ ഭരണതലത്തിലെ ഇടപെടൽ ഭരണകക്ഷിയിലും പ്രതിപക്ഷത്തിലും ചർച്ചയായി. 2019 ലെ പ്രളയത്തിൽ വൻ നാശനഷ്​ടം നേരിട്ട കർണാടകക്ക്​ ആവശ്യപ്പെട്ട ഫണ്ട്​ പോലും കേന്ദ്രം അനുവദിക്കുന്നില്ലെന്ന്​ ​പ്രധാനമന്ത്രി നരേന്ദ്രമോദിയെ വേദിയിലിരുത്തി പറയേണ്ട ഗതികേടും യെദിയൂരപ്പക്കുണ്ടായി. കോവിഡ്​ വ്യാപനത്തി​െൻറ ഒന്നാം ഘട്ടത്തിൽ സർക്കാർ നടത്തിയ കോടികളുടെ അഴിമതി വിവരം കോൺഗ്രസ്​ പുറത്തുകൊണ്ടുവന്നു. അനധികൃത ഭൂമി ഇടപാട്​ കേസിൽ മുഖ്യമന്ത്രി വിചാരണ നേരിടണമെന്ന്​ കർണാടക ഹൈക്കോടതിക്ക്​ പറയേണ്ട സാഹചര്യവുമുണ്ടായി.

ഒടുവിൽ രണ്ടു വർഷം തികക്കുന്നതോടെ മുഖ്യമന്ത്രിപദത്തിൽനിന്നിറക്കാൻ പാർട്ടിയിൽ ചരടുവലി സജീവമായി. ബി.​െജ.പി നേതാക്കളായ കെ.എസ്​. ഇൗശ്വരപ്പ, നളിൻകുമാർ കട്ടീൽ തുടങ്ങിയവർ ഒളിഞ്ഞും യത്​നാൽ, എ.എച്ച്​. വിശ്വനാഥ്​, അരവിന്ദ്​ ബല്ലാഡ്​, സി.പി. യോഗേശ്വർ തുടങ്ങിയവർ തെളിഞ്ഞും പട നയിച്ചു. 78 കാരനായ യെദിയൂരപ്പയെ കർണാടകയിലെ സവിശേഷ സാഹചര്യം പരിഗണിച്ചാണ്​ പാർട്ടി നയം മാറ്റിവെച്ചും ബി.ജെ.പി മുഖ്യമന്ത്രിയാക്കിയത്​. 75 വയസ്സ്​ കഴിഞ്ഞവരെ മുഖ്യമന്ത്രിയടക്കമുള്ള പ്രധാന ചുമതലകൾ ഏൽപിക്കേണ്ടതില്ലെന്നാണ്​ ബി.ജെ.പി നയം.

ഇനി തീരുമാനം കേന്ദ്ര നേതൃത്വത്തിനാണ്​. ലിംഗായത്ത്​ നേതാവായ അദ്ദേഹത്തി​െൻറ സ്വാധീനത്തെ അവഗണിച്ച്​ പാർട്ടി കടുത്ത തീരുമാനത്തിലേക്ക്​ നീങ്ങുമോ എന്ന്​ കണ്ടറിയണം. വിശേഷിച്ചും, പിന്തുണയുമായി ലിംഗായത്ത്​ മഠാധിപതികളടക്കം പരസ്യമായി രംഗത്തിറങ്ങിയ സാഹചര്യത്തിൽ. അധികാരത്തിൽ അൽപായുസ്സ്​ മാത്രമാണ്​ യെദിയൂരപ്പക്ക്​ ഇതുവരെയുള്ള അനുഭവം. 2008ലും ഒാപറേഷൻ താമരയിലൂടെ അധികാരത്തിലെത്തിയ യെദിയൂരപ്പക്ക്​ പിന്നീട്​ ഒാർക്കാൻ അത്ര നല്ലതല്ലാത്ത അനുഭവങ്ങളാണ്​ ഭരണത്തിൽ പിന്നീടുണ്ടായത്​.

അഴിമതിക്കേസിൽപെട്ട്​ ജയിലിലെത്തിയ അദ്ദേഹം 2012ൽ പാർട്ടിയോട്​ പിണങ്ങി കർണാടക ജനത പക്ഷ (കെ.ജെ.പി) എന്ന പേരിൽ പാർട്ടിയുണ്ടാക്കി. പിന്നീട്​ ബി.ജെ.പിയിൽ തിരിച്ചെത്തി ലോക്​സഭാംഗമായി. 2018 നിയമസഭ തെരഞ്ഞെടുപ്പിൽ ബി.ജെ.പിയെ ഏറ്റവും വലിയ ഒറ്റക്കക്ഷിയാക്കി മാറ്റി. കോൺഗ്രസ്​-ജെ.ഡി-എസ്​ സഖ്യത്തെ മറികടന്ന്​ ഗവർണറുടെ പ്രത്യേക താൽപര്യത്തിൽ സർക്കാർ രൂപവത്​കരിച്ച്​ സത്യപ്രതിജ്​ഞ ചെയ്​ത യെദിയൂരപ്പ ഭൂരിപക്ഷം തെളിയിക്കാനാവാതെ മൂന്നു ദിവസത്തിനുള്ളിൽ രാജിവെച്ചു. പിന്നീട്​ സഖ്യം ഭരണത്തിലേറിയതും ഒരു വർഷത്തിനുശേഷം സഖ്യത്തെ അട്ടിമറിച്ച്​ യെദിയൂരപ്പയുടെ നേതൃത്വത്തിൽ ബി.ജെ.പി ഭരണം പിടിച്ചതും കർണാടക രാഷ്​ട്രീയചരിത്രത്തിലെ കറുത്ത ഏടുകളാണ്​.

Show Full Article
Girl in a jacket

Don't miss the exclusive news, Stay updated

Subscribe to our Newsletter

By subscribing you agree to our Terms & Conditions.

Thank You!

Your subscription means a lot to us

Still haven't registered? Click here to Register

TAGS:Karnataka CMBJPYediyurappa
News Summary - Yediyurappa complete two years in Karnataka Chief Minister Post
Next Story