യശ്വന്ത്​ സിൻഹയുടെ കർഷക സമരത്തിന് ​പിന്തുണയുമായി കെജ്​രിവാളും മമതയും

മുംബൈ: മഹാരാഷ്​ട്രയിലെ ബി.ജെ.പി സർക്കാറിനെതിരായ കർഷക സമരത്തി​​െൻറ ഭാഗമായി പൊലീസ്​ ഗ്രൗണ്ടിൽ സമരം ചെയ്യുന്ന മുതി​ർന്ന ബി.ജെ.പി നേതാവ്​ ​യശ്വന്ത് സിന്‍ഹക്ക്​ പിന്തുണയുമായി ഡൽഹി മുഖ്യമന്ത്രി അരവിന്ദ്​ കെജ്​രിവാളും ബ​ംഗാൾ മുഖ്യമന്ത്രി മമതാ ബാനർജിയും രംഗത്തെത്തി. ട്വിറ്ററിലൂടെയാണ് മുഖ്യമന്ത്രിമാർ സിൻഹക്ക്​ പിന്തുണ പ്രഖ്യാപിച്ചത്​.

യശ്വന്ത്​ സിൻഹയെ അറസ്​റ്റ്​ ചെയ്​ത നടപടി ശരിയായില്ലെന്നും അദ്ദേഹത്തെ ഉടൻ തന്നെ മോചിപ്പിക്കണമെന്നും​ കെജ്​രിവാൾ ട്വീറ്റ്​ ചെയ്​തു. യശ്വന്ത്​ സിൻഹയെ കാണാൻ എം.പി ദിനേശ്​ ത്രിവേദിയെ അയക്കുമെന്നും അദ്ദേഹത്തി​​െൻറ സമരത്തിന്​ എല്ലാവിധ പിന്തുണയും നൽകുമെന്നുമാണ്​ മമതാ ബാനർജി ട്വീറ്റ്​ ചെയ്​തത്​.

സര്‍ക്കാര്‍ കര്‍ഷകരെ അവഗണിക്കുന്നുവെന്നാരോപിച്ച് നൂറുകണക്കിന് പരുത്തി, സോയാബീന്‍ കര്‍ഷകരാണ് യശ്വന്ത് സിന്‍ഹയുടെ നേതൃത്വത്തില്‍ തിങ്കളാഴ്ച അകോല ജില്ലാ കളക്ട്രേറ്റിന്​ പുറത്ത്​ സമരം നടത്തിയത്​. വൈകുന്നേരം യശ്വന്ത് സിന്‍ഹയേയും കര്‍ഷകരേയും മഹാരാഷ്ട്ര പൊലീസ് കസ്റ്റഡിയിലെടുക്കുകയായിരുന്നു.​ 9:50ന്​ വിട്ടയക്കാൻ തീരുമാനിച്ചെങ്കിലും കർഷകരുടെ ആവശ്യങ്ങൾ നിറവേറ്റാതെ സ്‌റ്റേഷന്‍ വിട്ടുപോകാന്‍ സിന്‍ഹയും കര്‍ഷകരും തയ്യാറായില്ല. തുടർന്നാണ്​ പോലീസ്​ ഗ്രൗണ്ടിൽ സമരം തുടരാൻ തീരുമാനിച്ചത്.